Taksi sürücüsünü öldürən rus hərbçilərinə hökm oxundu
Hadisə yerli sakinlərlə Rusiya hərbçiləri arasında gərginliyə səbəb olmuşdu
Ölkə.Az xəbər verir ki, Tacikistanda 201-ci Rusiya hərbi bazasının (RHB) hərbçiləri Mərkəzi hərbi dairə məhkəməsi tərəfindən taksi sürücüsünün qətlində təqsirli biliniblər.
Hərbi məhkəmənin qərarına əsasən, Fyodor Basimov 17, İldar Salahov isə 13 il azadlıqdam məhrumetmə cəzasına məhkum olunublar. Məhkəmə prosesi Düşənbə şəhərində 201-ci RHB-nin ərazisində bağlı qapılar arxasında keçib.
Xatırladaq ki, onların ikisi də ötən ilin avqustunda həbs olunmuşdular. 19 avqustda 45 yaşlı taksi sürücüsü Rahimjon Teshaboevin cəsədi Düşənbənin yaxınlığında Rudaki rayonunda aşkar edilmişdi.
Aparılan araşdırmalar zamanı 3 uşaq atası olan sürücünün qətldən əvvəl qəddarcasına döyüldüyü üzə çıxmışdı.
Bu hadisə yerli sakinlərlə Rusiya hərbçiləri arasında gərginliyə səbəb olmuşdu.
Rəşid Mustafazadə
Ölkə.Az
