ABŞ-da jurnalistlərin qətlinin səbəbi bilindi
Məktubda bunları deyib
Ölkə.Az xəbər verir ki, Virciniyada WDBJ7 telekanalının iki əməkdaşını qətlə yetirən Vester Li Flenaqan ABC News-un redaksiyasına faks məlumatı göndərib.
Məktubda o, Brays Uilyams adı ilə hərəkətinin səbəblərini açıqlayıb. Öldürülən jurnalistlərin sabiq həmkarı olan Flenaqan WDBJ7-da işləyərkən məhz bu təxəllüsdən istifadə edib. O bildirir ki, qətl hadisəsi Çarlstonda qaradərililər üçün kilsədə ziyarətçilərin güllələnməsinə cavab olub.
17 iyunda 21 yaşlı irqçi Dilann Ruff kilsəyə daxil olaraq atəş açıb. Nəticədə 6 qadın və 3 kişi həlak olub.
Bundan əlavə, müəllif 2007-ci ilin aprelində Virciniya politexnik institutunda 32 tələbəni güllələyən Cənubi Koreyadan olan tələbə Ço Sın Xi və 1999-cu ildə Kolumbayn məktəbində 13 nəfəri qətlə yetirən yeniyetmələrə heyranlığını ifadə edib.
Flenaqan irqi ayrıseçkilik, cinsi təcavüzkarlıq, iş yerində qısqılar, ağ və qaradərili şəxslər tərəfindən hücumlardan şikayətlənib. Onun fikrincə, hər kəs onu gey və qaradərili olduğu üçün alçaldırmış.
"Müəyyən müddət ərzində mən partlamağa hazır olan barıt çəlləyi olmuşdum", - deyə məktubda qeyd edilib.
Qeyd edək ki, son illər ərzində jurnalistin karyerası uğursuz olur. Kanalda işdən azad olunan Flenaqan irqi zəmində təhqirlərə məruz qaldığını ifadə edən iddia imzalamışdı.
Xatırladaq ki, avqustun 26-da ABŞ-ın Virciniya ştatında canlı yayım zamanı WDBJ7 telekanalının reportyoru Alison Parker və fotoqraf Adam Vard keçmiş həmkarı Brays Uilyams tərəfindən güllələnib. Bundan sonra B.Uilyamsın intihar etdiyi barədə məlumat yayılmışdı.
ABŞ-ın Virciniya ştatında canlı yayım zamanı 2 jurnalisti öldürən 41 yaşlı Brays Uilyams kimi tanınan Vester Flenaqan intihara cəhd etsə də, sağ qalmışdı.
Sonradan Vester Flenaqanın xəstəxanada vəfat etdiyi bildirilmişdi.
Onu da əlavə edək ki, insidenti şərh edən Ağ Evin mətbuat katibi Coş Ernest deyib ki, odlu silahdan istifadə ilə cinayətlər ABŞ-da adi hal alıb. O həmçinin, Konqresdə bu kimi cinayətlərin qarşını almaq üçün qanun layihələrinin olmadığını vurğulamışdı.
Rəşid Mustafazadə
Ölkə.Az
