Tailandda terror aktını törətməkdə şübhəli bilinən şəxs tutuldu

Videogörüntülərdəki şəxsə bənzəyir

Ölkə.Az "Reuters" informasiya agentliyinə istinadla xəbər verir ki, Tailand polisi Banqkokda terror aktı törətməkdə şübhəli bilinən şəxsi saxlayıb.

Rəsmi məlumatlara əsasən, şübhəlinin mənzilində aparılmış axtarış nəticəsində partlayıcı maddələrin hazırlanması üçün materiallar aşkar edilib. Bundan əlavə, saxlanılan şəxs videogörüntülərdəki şəxsə bənzəyir.

Xatırladaq ki, 17 avqustda Tailand paytaxtında partlayış baş verib. Rəsmi qurumlar tərəfindən partlayış terror aktı kimi qiymətləndirilib. Hadisə yerinin yaxınlığında daha iki partlamamış bomba aşkarlanıb.

Son məlumatlara görə, terror aktı nəticəsində 20 nəfər ölüb, ölənlər arasında dörd əcnəbi də var. Daha 125 nəfər müxtəlif dərəcəli bədən xəsarəti alıb.

Taylandın müdafiə naziri general-polkovnik Pravit Vonqsuvanın sözlərinə görə, cinayətkarlar Taylandın iqtisadiyyatını və turizmini dağıtmağı planlaşdırıblar, belə ki, partlayış turizm mərkəzi kimi tanınan rayonun mərkəzi hissəsində törədilib.

Rəşid Mustafazadə

Ölkə.Az