İŞİD-dən növbəti vandalizm aktı

Nə vaxt törədildiyi hələlik məlum deyil

Ölkə.Az "Reuters" agentliyinə istinadən xəbər verir ki, İŞİD terror qruplaşmasının yaraqlıları qədim Palmira şəhərində məbədlərdən birini dağıdıblar.

Palmirada Qədim Roma dövrünə aid olan məbədin bir hissəsi tamamilə məhv edilib. Vandalizm aktının dəqiq nə vaxt törədildiyi hələlik məlum deyil.

Ötən həftə İŞİD terror təşkilatının yaraqlıları Suriyanın Palmira şəhərində Baal-Şamina məbədini partladıblar. Sözügedən məbəd eramızdan əvvəl II əsrdə qədim semit tanrısının şərəfinə ucaldılmışdı. Baş verənlərə şahidlik edən şəxslər bildirir ki, partlayış nəticəsində Qədim Roma kolonlarına da zərər dəyib.

Bir neçə gün öncə İŞİD terrorçuları Suriyanın Əl-Karyatayn şəhərindəki xristian məbədini yerlə bir etmişdilər.

Bəzən Tədmur adlanan Palmira Suriya ərazisində yerləşən qədim şəhərdir. O,1980-ci ildən UNESCO-nun Dünya Mədəniyyət Mirasları siyahısına salınıb.

Rəşid Mustafazadə

Ölkə.Az