Moskva bilir ki, bu, Türkiyə ilə birbaşa qarşıdurma deməkdir - Elbakyan

“Kişinyovdakı görüşdən heç bir müsbət gözlənti yoxdur. Ermənistan qarşısında öhdəlik götürmək Qərbin maraqlarından irəli gəlmir”.

“Ölkə.Az” xəbər verir ki, bunu erməni politoloq Edqar Elbakyan deyib.

O indiki şəraitdə İrəvanla Bakı arasında böyük bir sənədin imzalanacağına qətiyyən inanmır. 

Elbakyan hesab edir ki, əgər Qərb bu sənədin Rusiyanın regiondan çıxmasına imkan verəcəyinə inanarsa, bəli, sülh sənədinin imzalanması mümkündür.

“Rusiyanın isə belə bir ssenarinin qarşısını almaq üçün alətləri yoxdur. Onlar olsaydı, Ukraynada bütün bunların qarşısı vaxtında alınardı. Bundan əlavə, artıq Rusiya elitasının bir hissəsi Cənubi Qafqazın itirilməsini çox böyük problem hesab etmir”, - politoloq izah edib.

Onun sözlərinə görə, Moskva regionda kəskin addımlar atmaq qərarına gəlsə, bu, Türkiyə ilə birbaşa qarşıdurma demək olacaq.

“Ona görə də Ermənistan öz problemlərinin həllini ölkə daxilində axtarmalıdır”, - o bildirib.

Eyni zamanda hesab edir ki, hazırda Ermənistanın subyektivliyini itirdiyi böyük bir geosiyasi oyun var: “O baxımdan da biz pərdəarxası danışıqların aparıldığının şahidiyik. Əminliklə deyə bilərəm ki, bu da  Ermənistanın Qarabağı Azərbaycanın tərkib hissəsi kimi tanıması istiqamətində siyasi sövdələşmələrdən ibarətdir. ABŞ Dövlət Departamentinin sözçüsü Metyu Millerin Vaşinqtonun “Prezident İlham Əliyevin amnistiya məsələsi ilə bağlı son açıqlamalarını alqışlayır” deməsi buna əsas verir”.

Mürtəza
Ölkə.Az