Kadırovun \"qorxduğu\" düşməninin oğlu Ukraynada öldürüldü

Ukraynadakı müharibədə "Vaqner" dəstəsi tərəfindən döyüşən Səid-Hüseyn Yamadayev öldürülüb. O, keçmiş çeçen səhra komandiri, Dövlət Dumasının deputatı və Rusiya Qəhrəmanı Ruslan Yamadayevin oğlu idi.

Ölkə.Az xarici mediaya istinadən xəbər verir ki, vaxtilə nüfuz sahibi olan Yamadayevlər ailəsi keçmişdə Ramzan Kadırovun siyasi rəqibi və şəxsi düşməni hesab olunub.

Səid-Hüseynin atası Ruslan Yamadayev 2008-ci ildə Moskvada öldürülüb. Onun ölümü Respublikanın rəhbəri Ramzan Kadırovla bağlı idi. Çeçen adət-ənənəsinə əsasən, Səid-Hüseyn atasının qanına görə Kadırovlar ailəsindən qisas almalı idi.

Onların arasında açıq qarşıdurma 2008-ci ilin aprelində başlayıb. Çeçenistanın Qudermes şəhəri yaxınlığındakı federal magistralda Yamadayevlərin ən gənci Badrudinin komandanlığı altında “Vostok” batalyonunun bir qrup hərbçisi Kadırovun kortejinə yol verməyib. Yolda baş verən münaqişə zamanı Badrudi Ramzan Kadırovu təhqir edib. Bundan sonra Yamadayev qardaşları ilə Kadırovlar arasında atışma olub və Çeçenistan rəhbəri keçmiş müttəfiqi olan qardaşlardan birini adam oğurluğu və pul tələb etməkdə ittiham edib. Beləliklə, Ramzan Kadırov potensial rəqiblərindən qurtulmağa başlayıb.