Britaniya kraliçasına sui-qəsd hazırlayan İŞİD-çilər öldürüldü

Hücumlar dünyanın hər yerində: Yaxın Şərq, Şimali Afrika, Avropa və Asiyada baş verə bilər

Ölkə.Az xəbər verir ki, Suriyada öldürülən İŞİD terror təşkilatınınü zvləri Cunayd Hüseyn və Riyad Xanın Böyük Britaniya kraliçası II Yelizavetaya qarşı sui-qəsd hazırladıqları iddia olunub. Bu barədə məlumat "Daily Express" qəzetinin saytında yer alıb.

"Mİ-5 terrorçuların kraliçaya qarşı sui-qəsd planlarını alt-üst edib. Bu il İŞİD Böyük Britaniyada 6 irimiqyaslı hücum təşkil etməyi planlaşdırıb", - deyə məlumatda qeyd olunub.

Ölkənin baş naziri Devid Kemeron parlamentdə çıxışı zamanı son 12 ayda 6 terror aktının qarşısının alındığını bəyan edib.

Təqribən bir ay öncə ABŞ "Əl-Qaidə" və İŞİD terror təşkilatlarının Avropa və digər ölkələrdə Amerika vətəndaşlarına qarşı yeni terror aktları planlaşdırması ilə bağlı informasiyalar əldə ediblər. Bu barədə məlumat ABŞ Dövlət Departamentinin dünən qlobal terror təhlükəsi ilə bağlı yenilənmiş xəbərdarlığında yer alıb.

Sənəddə deyilir ki, 2014-cü ilin avqustunda ABŞ və müttəfiq ölkələr İraq və Suriyada İŞİD-ə qarşı hərbi-hava əməliyyatlarına başlayıblar və hal-hazırda ABŞ, Qərbdən olan müttəfiqlərə, koalisiya iştirakçılarına qarşı terrorçuların cavab hücumlar hazırlayacağı ehtimalı güclənir.

Bildirilir ki, bu cür hücumlar dünyanın hər yerində: Yaxın Şərq, Şimali Afrika, Avropa və Asiyada baş verə bilər.

Rəşid Mustafazadə

Ölkə.Az