Türkiyədə terrora qarşı etirazlar dayanmır

HDP binalarına hücumlar edilib

Ölkə.Az xəbər verir ki, Türkiyənin müxtəlif bölgələrində son zamanlar artan terror aktlarına qarşı etirazlar baş tutub.

Hakkarinin Yüksəkova rayonunun Dağlıca bölgəsində və digər şəhərlərdə baş verən terror aktlarından sonra yerli sakinlər terrora qarşı etirazlara başlayıblar. Türkiyənin İzmir şəhərində son günlər artan terror aktlarına etiraz edən bir qrup şəxs Xalqların Demokrat Partiyasının (HDP) binasına daşlarla hücum təşkil edib.

Bundan xəbər tutan partiya mənsubları müdaxilə etmək üçün əraziyə toplaşıb. Polis qüvvələrinin HDP üzvlərinin ərazidən uzaqlaşması tələblərindən sonra polis və etirazçılar arasında toqquşma baş verib.

Etirazlar bununla bitməyib. Belə ki, Ataşəhərdə HDP-nin binasına daxil olan bir qrup şəxsı içəridəki əşyaları 4-cü mərtəbədən aşağı ataraq, onlara od vurublar.

Bolu şəhərində isə 100 nəfərə yaxın etirazçı şəxs mağazaları dağıdıblar. Kocaelidə 10 mindən çox insan əllərində Türkiyə bayraqları ilə yürüş ediblər. HDP-nin binasına hücum etməyə çalışan 5 nəfər saxlanılıb.

Qeyd edək ki, bir müddət öncə PKK-nın Naxçıvanla sərhəddə terror törətməsi nəticəsində 14 polis şəhid olub.

Sentyabrın 6-da Haqqari vilayətinin Dağlıca kəndində basdırılan partlayıcının işə düşməsi nəticəsində 16 hərbçi şəhid olub, 6 nəfər yaralanıb. Hazırda Türkiyə Silahlı Qüvvələri bölgədə geniş miqyaslı antiterror əməliyyatları aparır.

Rəşid Mustafazadə

Ölkə.Az