Moldovanın baş naziri: \"Hökumət istefa verməyəcək\"

Onlar sabitlik, normal həyat şəraiti tələb edirlər

Ölkə.Az xəbər verir ki, Moldovanın baş naziri Valeriu Streles bu gün Böyük Milli Məclis Şurasının nümayəndələri ilə görüşdə hökumətin istefa verməyəcəyini söyləyib.

"Biz hökumətin istefa verməsi məsələsi istisna olmaqla, etirazçıların bütün tələblərini müzakirə etməyə hazırıq. Əgər siz vətəndaşların problemləri müzakirə etməyə razısınızsa, biz buna hazırıq. Biz birlikdə irəliləmək və insanları problemlərini həll etmək üçün "yol xəritəsi" tərtib etməyə hazırıq. Hökumətin istefası vəziyyətin sabitliyinin pozulmasına gətirib çıxara bilər, buna isə heç bir halda yol vermək olmaz", - deyə nazir qeyd edib.

Baş nazirin müavini Georqe Breqa bildirib ki, meydandakı insanlardan və etirazçıların 20-30 liderinin tələblərindən başqa yüz minlərlə vətəndaş var və onlar sabitlik, normal həyat şəraiti tələb edirlər.

Xatırladaq ki, sentyabrın 6-dan Moldovanın paytaxtı Kişinyovda kütləvi anti-hökumət mitinqi keçirilir. Böyük Milli Məclis meydanına on minlərlə etirazçı toplaşıb.

Aksiya iştirakçıları hökumətin ölkədəki sosial-iqtisadi vəziyyətə görə məsuliyyət daşıdığını bəyan edir və anti-hökumət şüarları səsləndirirlər. Onların çoxu əllərində Moldova, Rumıniya və Avropa Birliyinin bayraqlarını tutub.

Etirazçılar bank sistemindən pulların oğurlanmasına səbəbkar olanların məsuliyyətə cəlb olunmasını tələb edirlər. Hələlik mitinqin sakit keçdiyi bildirilir. İctimai asayişi onlarla polis əməkdaşı qoruyur.

Moldovanın paytaxtı Kişinyovda etirazçılar 90-dan çox çadır qurublar.

İştirakçılar bəyan edir ki, konkret nəticələr əldə olunana qədər çadırların sayı artırılacaq. Bir müddət öncə hüquq-mühafizə orqanlarına qarşı davranışlara görə 8 nəfər həbs olunub.

Rəşid Mustafazadə

Ölkə.Az