Macarıstanda qaçqınlar kütləvi şəkildə saxlanılır

9 mindən çox qaçqın saxlanılıb

Ölkə.Az "Reuters" informasiya agentliyinə istinadla xəbər verir ki, Macarıstanda polis əməkdaşları Serbiyadan gələn 9380 qaçqını saxlayıblar.

Xatırladaq ki, rəsmi Budapeşt Yaxın Şərqdən Avropaya axışan qaçqınların əsas marşrut dəhlizi olan "Reske-Xorqoş" sərhəd-keçid məntəqəsinin bağlanması haqda qərar qəbul etmişdi. Bundan başqa macar polisi dəmir yolunu da bağlamışdı.

Yaxın zamanlarda bu marşrut üzrə onminlərlə Suriyalı, əfqan, iraqlı və Afrika ölkələrinin vətəndaşlarının Avropaya kütləvi axın edəcəkləri gözlənilir. Macarıstan bu axının qarşısını almaq üçün Serbiya ilə sərhədə əlavə polis və ordu birlikləri göndərir.

15 sentyabrda Macarıstanda sərhədin qorunması və miqrasiya ilə bağlı qanunlar paketi qüvvəyə minmişdi.

Yeni qanunlarda ordunun sərhədə nəzarətdə iştirakı, qanunsuz sərhəd keçənlərə isə 3 illik həbs cəzasının verilməsi, qanunu pozanların Serbiyaya deportasiya edilməsi və qaçqın statusunun verilməsi ilə bağlı sorğulara baxılmasının sürətləndirilməsi əks olunub.

Rəşid Mustafazadə

Ölkə.Az