İŞİD interneti qadağan etdi

Qadağanı pozan şəxslər sərt formada cəzalandırılacaq

Ölkə.Az xəbər verir ki, İŞİD terror təşkilatı Suriyanın Fərat vilayətində yerləşən əl-Buxəmal şəhərində internet sisteminin qadağan olunduğunu bildirib.

Terrorçular bunu kütləyə payladıqları bəyannamə vasitəsilə bildiriblər. Nəşr olunan bəyanatda internet istifadəçilərinə və internet klublara müraciət yer alıb.

"19 sentyabrdan etibarən növbəti anonsa qədər hər hansı internet sistemini işlətmək qətiyyən qadağandır", - deyə bəyanatda vurğulanıb.

İnternetin qadağan olunduğu yerlərə aşağıdakılar daxildir: birgə istifadəyə açıq bütün yerlər, valyuta qurumları, restoran və neft stansiyaları, ev və özəl yerlər, kommersiya ofisləri, iş yerləri, sənaye və tibbi mərkəzlər.

Yeni qadağanı pozan şəxslərin sərt formada cəzalandırılacağı qeyd olunub.

Bir müddət öncə İŞİD qadınların dikdaban ayaqqabı geyinmələri yasaqlamışdı. Qadınların niqab üzərindən hər hansı bəzək vurulması da qadağan edilmişdi.

Rəşid Mustafazadə

Ölkə.Az