Ruhani: \"Düşmənçiliyin azaldılması istiqamətində ilk addımları atmışıq\"

O vurğulayıb ki, əldə olunmuş razılaşmalara baxmayaraq, fikir ayrılıqları, inamsızlıq yaxın zamanda bitəcək

Ölkə.Az "TASS" agentliyinə istinadən verdiyi xəbərə görə, İran prezidenti Həsən Ruhani bəyan edib ki, ABŞ və İran nüvə proqramı üzrə razılaşmanın əldə olunmasından sonra qarşılıqlı münasibətlərdə düşmənçiliyin azalması üçün ilk addımlar atıblar.

"Vacib olan bizim hansı istiqamətdə hərəkət etməyimizdir. Biz düşmənçiliyin azaldılması istiqamətində hərəkət edirikmi? Mən düşünürəm ki, biz düşmənçiliyin azaldılması istiqamətində ilk addımları atmışıq", - deyə Ruhani qeyd edib.

O vurğulayıb ki, əldə olunmuş razılaşmalara baxmayaraq, fikir ayrılıqları, inamsızlıq yaxın zamanda bitəcək.

Xatırladaq ki, 14 iyulda Vyanada İran ilə altılıq ölkələri arasında aparılan danışıqlarda tərəflər arasında razılaşma əldə olunub. Bu razılaşmaya görə, İran daxilində nüvə obyektlərinin təftişi - BMT inspektorlarına hərbi obyektləri təftiş etməyə icazə verilə bilər, amma bu avtomatik olmaya bilər. Həmçinin, İran razılaşır ki, əgər razılaşmanı pozarsa, sanksiyalar 65 gün ərzində bərpa oluna bilər. Bundan başqa, BMT-nin silah embarqosu və raket sanksiyaları 5-8 il ərzində qüvvəsində qalacaq.

İran ilə altılıq ölkələri arasında əldə olunan bu razılaşma dünyada birmənalı qarşılanmayıb. Bir çox ölkə İranla "altılıq" arasında əldə olunan razılığı dəstəkləsə də, digərləri tənqid edir.

Rəşid Mustafazadə

Ölkə.Az