Dünya qlobal iğtişaşa hazırlaşır: Sığınacaq bazarında aktivlik - FOTOLAR

Dünyanın fərqli coğrafiyalarında yaşanan hərbi toqquşmalar fonunda qlobal iğtişaşların yaranması riski istisna kimi görünmür.

Ölkə.Az xəbər verir ki, artıq Üçüncü Dünya müharibəsinin baş verəcəyi ehtimalı günümüzün aktual mövzularından hesab olunur.

İnsanların müharibə qurbanı olmaqdan qorxduqları bir zamanda biznesmenlər yeni bazarı aktivləşdirməyə başlayıb.

Belə ki, xarici ölkələrdə "sağ qalma sığınacağı" dövrün tələbi kimi təqdim olunmağa başlayıb və bunun gələcək üçün yaxşı bir investisiya kimi göründüyü irəli sürülüb.

Reklam mətnində deyilir: "Artıq təkcə super zənginlərin daşınmaz əmlakı deyil, orada hər kəsin büdcəsinə uyğun variantlar var.

Memarlığın inkişafı və dizaynerlərin qayğısı "sağ qalma sığınacağı"nın gözəl bir nümunəsi ilə nəticələndi. Bu quruluş, sadəcə, bir sığınacaq deyil, asanlıqla ev hesab edilə bilər.
Təhlükəsiz rahat yataq otağı, ümumi vanna otağı və mətbəx fəaliyyətləri üçün yer, iki mərtəbəli çarpayılar və şəxsi iş yerləri, üstəlik, digər sağ qalanlarla kiçik bir əyləncə keçirmək üçün mükəmməl bir geniş yaşayış sahəsi təsəvvür edin".

Xatırlatmaq yerinə düşər ki, buna qədər alimlər dünyanın qlobal çöküşü zamanı sığınacaq üçün ən təhlükəsiz ölkələri müəyyən ediblər. Bu ölkələr arasında Yeni Zelandiya, İslandiya, İngiltərə, İrlandiya və Avstraliyanın Tasmaniya əyaləti var.

Mütəxəssislərin fikrincə, ağır maliyyə böhranı, qlobal istiləşmənin təsiri, təbiətin məhv olması, koronavirusdan daha pis pandemiya və ya ümumi olaraq bütün bunların cəmləşməsi qlobal çöküşlə nəticələnə bilər.

Ölkə.Az