Poroşenko: \"Krımın blokadaya salınmasında məqsəd....\"

"Krım sakinləri Ukraynaya münasibəti dəyişəcək və Kiyevin qanadı altına qayıdacaq"

Ölkə.Az-ın xəbərinə əsasən, Ukrayna prezidenti Pyotr Poroşenko bəyan edib ki, ictimai fəalların Krımın blokadaya salınması ilə bağlı aksiyalar təşkil etməsinin məqsədi yarımada üzərində dövlətçiliyin tezliklə bərpa edilməsidir.

Lvovda çıxış edən Poroşenko yolları bağlayan fəalların davranışlarını şərh edib. O hesab edir ki, blokada vasitəsilə Krım sakinləri Ukraynaya münasibəti dəyişəcək və Kiyevin qanadı altına qayıdacaq.

Poroşenkonun sözlərinə görə, Ukrayna sərhədçiləri və DİN aksiyaların keçirilməsi zamanı təxribatların qarşısının alınması və qayda-qanunun yaradılması əmri alıblar.

Xatırladaq ki, Krımın anneksiyasına etiraz olaraq tatar və ukraynalı fəallar Ukraynadan Krıma gedən bütün yolları bağlayıb. Yarımadaya yük aparan ağır tonnajlı bütün maşınların hərəkəti dayandırılıb.

Fəallar arasında "Sağ sektor"un da üzvləri var.

Rəşid Mustafazadə

Ölkə.Az