Putin Ərdoğanla görüşəcək
Görüşün keçirilməsi barədə məlumat Kremlin rəsmi saytında yer alıb
Ölkə.Az xəbər verir ki, bu gün Rusiya Federasiyası prezidenti Vladimir Putin Moskvada türkiyəli həmkarı Rəcəb Tayyib Ərdoğanla danışıqlar aparacaq.
Ərdoğan yenidənqurma işlərindən sonra açılan Moskva məscidinin açılışı münasibətilə Rusiyaya işgüzar səfər edəcək.
Görüşün keçirilməsi barədə məlumat Kremlin rəsmi saytında yer alıb.
"Həqiqətən Türkiyə prezidenti Moskva məscidinin açılışı mərasimində iştirak edəcək və bu münasibətlə onun Rusiya prezidenti ilə görüşü baş tutacaq, ikitərəfli söhbət keçiriləcək", - deyə prezidentin mətbuat katibi Dmitriy Peskov jurnalistlərə açıqlamasında qeyd edib.
ABŞ, Azərbaycan, Türkiyə, Hindistan, Sudan, Çad, Liviya, İraq nümayəndə heyətləri iştiraklarını təsdiqləyib.
Məsciddə bütün dizayn işlərini Türkiyə rəssamları yerinə yetiriblər. Məscid Avropada böyüklüyünə görə ən böyük dini obyekt olacaq. Onun sahəsi təqribən 19 min kvadratmetr təşkil edir. Altı minarəli məsciddə kişi və qadın ibadət zalları ilə yanaşı, konfrans zalı, sərgi qalereyası olacaq.
Rəşid Mustafazadə
Ölkə.Az