Fransada ara qarışdı: 500 nəfər etiraza qalxdı

Fransada 2024-cü il Paris Olimpiyadasına hazırlıq layihələrində və Böyük Paris nəqliyyat layihəsinin tikinti sahəsində çalışan əksəriyyəti Afrika əsilli 500-ə yaxın miqrant tətilə çıxıb.

Ölkə.Az xarici KİV-ə istinadla xəbər verir ki, miqrantlar iş şəraitinin yaxşılaşdırılmasını və hökumətdən immiqrasiya qanun layihəsini geri götürməsini tələb edib.

Belə ki, 33 şirkətdə eyni vaxtda tətilə başlanıb.

Tətilin baş verdiyi tikinti sahələri arasında Olimpiyadada istifadə üçün hazırlanmış 8 min nəfərlik "Porte de La Chapelle Arena" zalı da var. 

Həmkarlar ittifaqları zalın qarşısında keçirəcəkləri nümayişlərə dəstək çağırışı edib.

CNT-SO ittifaqı tətilin nə qədər davam edəcəyinin hələlik bəlli olmadığını açıqlayıb.

Fəhlələr həmçinin daxili işlər naziri Cerald Darmaninin təklif etdiyi immiqrasiya qanun layihəsini, miqrant işçilərin ayrı-seçkiliyini və istismarını artıracağını əsas gətirərək tənqid edirlər.

İmmiqrasiya qanun layihəsi deportasiya əmri olan immiqrantların “axtarılanlar siyahısına” salınmasına imkan verəcək. Qanun layihəsində həmçinin işçi qüvvəsi çatışmazlığı olan sektorlarda çalışan miqrant işçilərə yaşamaq icazəsinin verilməsi də nəzərdə tutulur.

Qanun layihəsinin gələn ay parlamentdə müzakirəyə çıxarılacağı gözlənilir.

Günay