Rəcəb Tayyib Ərdoğan: “Bəşər Əsəd “butik Suriya” qurmaq istəyir”
“Rusiyanın İranla birlikdə Suriya rejiminə verdiyi dəstək artıq gizli deyil. Bunu özləri də deyirlər”.
Bu sözləri Türkiyə prezidenti Rəcəb Tayyib Ərdoğan İstanbulda bayram namazından sonra jurnalistlərə açıqlamasında deyib. Bir gün əvvəl Moskvada Rusiya prezidenti Vladimir Putinlə görüşünü xatırladan R. T. Ərdoğan Rusiyanın bu görüşdən sonra lazımi addımları atacağına ümid etdiyini bildirib: “Dünən onlara da söylədim, Əsəd “butik Suriya” qurmaq istəyir. Şamdan başlayıb, Hama, Humus və Lazkiyeni əhatə edən və Suriyanın 15 faizlik hissəsi olan bir bölgədən söhbət gedir. Aralıq dənizinə çıxışı olan bu bölgədə özlərinə aid və arxasında bəzi hegemon güclərin olacağı bir dövlət qurmaq istəyirlər, Əsədin bütün dərdi budur. Biz isə Suriyanın ərazi bütövlüyünə tərəfdarıq. Suriya xalqının terror təşkilatlarından təmizlənmiş bir ölkədə yaşamasını arzu edirik. Lakin hazırkı məqamda orada güvənli bölgə yaradılmasını istəyirik. Türkiyədə 2 milyona yaxın suriyalı var və onlar öz torpaqlarına dönmək istəyirlər. Türkiyə sərhədlərində, Suriya tərəfdə onlar üçün yaradılacaq güvənli bölgə inanıram ki, bölgədə çox fərqli bir havanın yaranmasına səbəb olacaq. Bunu dost ölkələrlə də danışdıq və bu planı hörmətli Putinlə də bölüşdük”.
Türkiyə prezidenti qeyd edib ki, Suriyadakı keçid dövründə Bəşər Əsəd yer ala bilər, amma Suriyanın gələcəyində Əsədə yer yoxdur.
R. T. Ərdoğan Türkiyənin suriyalı qaçqınlar üçün indiyə qədər 7,5 dollar xərclədiyini söyləyərək Avropa İttifaqının Türkiyəyə 1 milyard avroluq yardım qərarını müsbət qiymətləndirib. O, ABŞ-ın PKK-nın Suriya qolu olan PYD-nin silahlı qanadı YPG-ni terror təşkilatı kimi görməməsi barədə sualı da cavablandırıb: “Bu yanlış mövqeni yenidən nəzərdən keçirəcəklərini düşünürəm. ABŞ əvəz ödəmir, əvəz ödəyən bizik. Biz PKK-nı da, PYD-ni də, “İŞİD”i də terror təşkilatı sayırıq. ABŞ da PKK-nı terror təşkilatı elan edib. Biz terror təşkilatlarının əlində Amerika silahını görəndə narahat oluruq. Düşünürəm ki, hörmətli baş nazirin bu barədə amerikalı tərəfdaşlarla danışıqları olacaq”.Apa
Ölkə.Az
