İsrail tankları Qəzza zolağına doğru irəliləyir, zərbələr endirilir

İsrail müdafiə qüvvələrinin tank birləşmələri Fələstin anklavının şimalında yerləşən Beyt-Hanun şəhərində təhlükəsizlik səddinə bitişik ərazidə Qəzza zolağına doğru irəliləyir.

Ölkə.Az-ın məlumatına görə, bu barədə yerli mənbələrə istinadən "Sky News Arabia" məlumat yayıb.

Telekanalın məlumatına görə, anklavın şimal sərhədində atışma və partlayış səsləri eşidilir. Öz növbəsində “Al Arabiyya” telekanalı qonşu Beyt Lahiya şəhərinin intensiv atəşə tutulduğunu qeyd edir. İsrail ordusu Qəzza zolağının şimalı üzərində də məşəllərdən atəş açır.

AFP yazır ki, İsrail ordusu Qəzza zolağının qərbinə hava zərbələri endirib, ərazidə bütün telekommunikasiyalar və internet kəsilib.

İsrail Müdafiə Qüvvələrinin rəsmi nümayəndəsi Daniel Haqari ordunun yerüstü əməliyyata başlayacağını bildirib. O qeyd edib ki, Quru qoşunları genişmiqyaslı hava zərbələri ilə eyni vaxtda Qəzza zolağında quru əməliyyatlarını genişləndirir.

Xarici KİV xəbər verir ki, bu, 7 oktyabrdan indiyədək olan ən şiddətli bombardmandır.

İsrail Müdafiə Qüvvələrinin rəsmi nümayəndəsi Daniel Haqari X hesabında bildirib: “Biz Qəzza və ətrafını vurmağa davam edirik. İsrail Müdafiə Qüvvələri hərbi məqsədlərinə nail olmaq üçün daha böyük güclə hərəkət edir”.

HƏMAS-ın yaydığı məlumatda isə deyilir: "Qəzza zolağı İsrail tərəfindən qurudan, dənizdən və havadan hücuma məruz qalıb".

Qəzza sakinlərinin sözlərinə görə, oktyabrın əvvəlindən bəri ən güclü hücum həyata keçirilir.

Hava hücumları və artilleriya atəşi endirilir. Sektorda elektrik yoxdur.

Qızıl Aypara təşkilatı bildirir ki, Qəzzanın beynəlxalq aləmlə əlaqəsi bütünlüklə kəsilib.