Yaponiya Rusiya ilə ərazi məsələsini müzakirə edəcək

Yaponiyanın Baş naziri Şinzo Abe sentyabrın 25-də Tokioda keçirdiyi mətbuat konfransında bəyan edib ki, Rusiya Prezidenti Vladimir Putinlə Nyu-Yorkda BMT Baş Assembleyasının sessiyası çərçivəsində görüşü zamanı ərazi məsələsini müzakirə etmək niyyətindədir.

Yaponiya parlamentinin növbəti sessiyasının başa çatması və qarşıdakı iqtisadi islahatlarla bağlı mətbuat konfransı keçirən Baş nazir Nyu-Yorka və Yamaykaya gözlənilən səfərlər başa çatdıqdan sonra Nazirlər Kabinetinin tərkibində dəyişikliklər aparılacağını da bildirib.

Rusiya Prezidenti ilə qarşıdakı görüşə toxunan Baş nazir deyib: “Rusiya Prezidenti Putin ilə planlaşdırılmış görüş zamanı mən “şimal əraziləri” məsələsini müzakirə etmək istəyirəm”. Ş.Abe həmçinin qeyd edib ki, o, Rusiya liderinin “yaxın zamanlarda” Yaponiyaya səfər edəcəyinə inanır. İki ölkə arasında münasibətlərə toxunan Baş nazir deyib: “Yaponiya ilə Rusiya arasında hələ də sülh müqaviləsi imzalanmayıb”.

Yaponiya hökumətinin rəhbəri Rusiya ilə yanaşı, Çin və Koreya Respublikası ilə də əlaqələri inkişaf etdirmək istədiyini bildirib. (AzərTac)

Ölkə.Az