Bu gün BMT-də siyasi müzakirələrə start verilir

144 dövlət və hökumət başçısının, 46 xarici işlər nazirinin çıxışı baş tutacaq

Ölkə.Az xəbər verir ki, bu gün BMT-nin qərargahında Baş Assambleyanın 70-ci sessiyası çərçivəsində ümumi siyasi müzakirələrə start veriləcək.

Oktyabrın 3-nə qədər davam edəcək siyasi müzakirələrdə 144 dövlət və hökumət başçısının, 46 xarici işlər nazirinin çıxışı baş tutacaq.

Müzakirələrin ilk günündə BMT-nin baş katibi Pan Gi Mun, Baş Assambleyanın 70-ci sessiyasının sədri Mogens Lyukketof, Braziliyanın prezidenti Dilma Russef, ABŞ prezidenti Barak Obama, Çin Xalq Respublikasının sədri Si Tzinpin, İordaniya Kralı II Abdullah, Rusiya prezidenti Vladimir Putin çıxış edəcək.

Qeyd edək ki, Putin sonuncu dəfə Baş Assambleyanın tribunasında 2005-ci ildə çıxış edib.

29 sentyabrda isə Ukrayna prezidenti Pyotr Poroşenko, Ermənistan və Tacikistan prezidentlərinin çıxışları gözlənilir.

Yunanıstanın baş naziri Aleksis Tsiprasoktyabrın 1-də çıxış edəcək. Onun çıxışı ən çox gözlənilən çıxışlardan biridir. Tsiprasdan başqa həmin gün İsrailin baş naziri Benyamin Netanyahu, KXDR-nın rəhbəri Li Su Yen, Suriyanın xarici işlər naziri Valid Muallemi də nitq söyləyəcək.

Azərbaycan xarici işlər naziri Elmar Məmmədyarov isə 1-2 oktyabr tarixlərində müzakirələrdə çıxış edəcək.

BMT-nin Baş Assambleyasının 70-ci sessiyası çərçivəsində baş tutacaq siyasi müzakirələrdə əsas mövzular dünyada artmaqda olan münaqişələr, Avropada qaçqın böhranı, terror təhlükəsi, dünyada sülh və təhlükəsizlikdir.

Rəşid Mustafazadə

Ölkə.Az