Toyda ölənlərin sayı 130-u keçdi

Yəməndə toy mərasiminə endirilən hava zərbəsi nəticəsində ölənlərin sayı 130-u keçib.

Hadisə Qırmızı Dəniz sahilində yerləşən Əl-Moxa limanı yaxınlığındakı Vahijah kəndində baş verib. Məlumata əsasən, raketlər Husi üsyançıları ilə əlaqəsi olan şəxsin toy üçün qurduğu çadırlara dəyib.

Səudiyyə Ərəbistanı rəhbərliyi altında beynəlxalq koalisiya hadisəyə aidiyyatı olmadığını bildirir.
BMT-nin baş katibi Ban Ki-moon Yəməndəki münaqişə tərəflərinin insan həyatına saymazlıq göstərən rəftarı pisləyib.

Bazar ertəsi ölənlərin arasında ən azı 8 uşağın olduğu bildirilib. AP xəbər agentliyi hökumət rəsmisinə istinadən xəbər verib ki, hava hücumu "səhvən həyata keçirilib".
Yəməndə silahlı qarşıdurma bir ilə yaxındır ki, davam edir.

Münaqişə nəticəsində 2100-dən artıq mülki də daxil olmaqla 4500-ə yaxın adam həyatını itirib, BMT xəbər verir.

Prezidenti Mənsur Hadinin ər-Riyada qaçmasından sonra Səudiyyənin rəhbərlik etdiyi koalisiya Husi üsyançılarına qarşı hava hücumlarını həyata keçirir. Husilər Yəmənin böyük hissəsini nəzarət altına alıblar. (qafqazinfo)

Ölkə.Az