"Suriya məsələsində nə Obama, nə də Putin haqlıdır"

Rusiya Federasiyası prezidenti Vladimir Putin İŞİD terror təşkilatı ilə mübarizədə hər kəsi koalisiyada birləşməyə çağırıb. Putinin fikrincə, bu cür koalisiya müxtəlif hakimiyyətləri birləşdirəcək: demokratiya, diktatorluq və teokratiya.

Ölkə.Az xəbər verir ki, bu barədə "The Washington Post"da Obama və Putinin çıxışlarına həsr olunmuş redaktor məqaləsində yazılıb.

Müəlliflərin sözlərinə görə, Yalta koalisiyasına oxşar koalisiya təkliflərini irəli sürən Putin ABŞ və müttəfiqlərin təkcə faşizmə qarşı yox, həm də demokratiya uğrunda mübarizə apardıqlarını unudur.

Obama isə bəyan edib ki, Suriyada kütləvi qətllər Əsədin demokratik qüvvələrin üsyanını qəddarlıqla yatırmasından sonra başlayıb. ABŞ prezidentinin bəyan etdiyi kimi, əsl demokratiyanın hakim olduğu ölkədə bu cür hallar baş verə bilməz.

Müəlliflər iddia edir ki, Obamanın bəyanatı daha realdır, ancaq problem amerika liderinin strategiyasının olmamasıdır. Putin isə sözlərini İran və İraqla potensial alyans və gücünü nümayiş etdirməklə möhkəmləndirir.

"Cənab Obama ekstremistlərin əllərinə silah almasına qədər effektiv şəkildə suriya qiyamını dəstəkləyə bilməyib", - deyə məqalədə vurğulanıb.

"The Washington Post"dakı məqalədə qeyd olunur ki, Obama Suriya üzərindəki kompromisslə Rusiya və İranla əməkdaşlığı təklif edir.

Rəşid Mustafazadə

Ölkə.Az