NATO Yaxın Şərqdəki birliklərini döyüş hazırlığı vəziyyətinə gətirdi

Rusiyanın Suriyadakı həmlələri bölgədəki gərginliyi artırdı.

Ölkə.az xəbər verir ki, Suriya rejiminə yardım edən Rusiyanın İŞİD və Ən-Nusra cəbhəsinin mövqelərinə endirdiyi zərbələrdən sonra ABŞ-ın regiondakı hərbi bazalarına döyüş həyəcanı siqnalı verilib.

Türkiyənin Adana şəhəri yaxınlığındalı ABŞ-ın İncirlik hərbi bazasına yeni qırıcı-bombardımançı və kəşfiyyat təyyarələri gətirilib. Rusiyanın aktivləşməsi ABŞ və müttəfiqi olan Türkiyəni əlavə tədbir görməyə mıcbur edib. Suriya və İraq sərhədi boyunca yerləşən türk ordusunun hərbi obyektləri də əlavə qüvvələr və hərbi ləvazimatla möhkəmləndirilib.

Türkiyə silahlı qüvvələrinin Diyarbəkirdəki hərbi hava bazasına iki ABŞ hərbi-nəqliyyat təyyarəsinin endiyi bildirilir. Bölgədəki hərbi mənbələrdən mətbuata sızan məlumatlarda NATO-nun Yaxın Şərqdəki hərbi güclərinin də gücləndirilmiş xidmət rejiminə keçdiyi bildirilir.

Xatırladırıq ki, dünən gecədən başlayaraq Suriyaya gətirilmiş rus hərbi təyyarələri Əsədə kömək üçün İŞİD və Suriya müxalifətinin digər qruplarının nəzarətində olan şəhər və yaşayış məntəqələrinə 30-dan çox hava zərbəsi endiriblər.

Ölkə.az