Tramp: "Qəddafi və Səddam Hüseynin dövründə sabitlik var idi"

Tramp Əsədin devrilməsinə qarşı çıxıb

Ölkə.Az xəbər verir ki, ABŞ-da Respublikaçılar partiyasından prezidentliyinə namizəd Donald Tramp NBC telekanalında "MeetThe Press" verilişində Yaxın Şərqdəki vəziyyətlə bağlı önəmli açıqlamalar verib.

O bildirib ki, Yaxın Şərq Müəmmar Qəddafi və Səddam Hüseynin hakimiyyəti dövründə müqayisə edilməz dərəcədə dinc idi.

Tramp bu fikirlərini Obamanın təkidlə Suriyanın prezidenti Bəşər Əsədin devrilməsinə qarşı arqument kimi təqdim edib. O bəyan edib ki, Rusiyanın Suriyadakı hərbi fəaliyyətini dəstəkləyir və qeyd edib ki, Dəməşqdə rejimin devrilməsi nəticəsində Əsədin yerinə daha pis diktator gələ bilər.

Xatırladaq ki, Donald Tramp Rusiyanın Suriyada hava zərbələri endirməsinə dəstək vermişdi.

"Əgər onlar İŞİD-i məğlub etmək istəyirsə, bu mənim üçün uyğundur", - deyə Tramp müsahibədə bildirmişdi.

Qeyd edək ki, keçirilən sorğulara əsasən, Donald Tramp respublikaçı namizədlər arasında liderdir. İndiyədək seçki kampaniyalarında səbəbkar olduğu qalmaqalların onun reytinqinə müsbət, yoxsa mənfi təsir etdiyi isə hələ də bilinmir. Donlad Tramp kampaniyalar zamanı cəmiyyət içində rəqiblərindən birini təhqir edib, teledebat işçiləri ilə mübahisə edib və Respublikaçılar partiyasının bir neçə üzvü ilə dalaşıb.

Rəşid Mustafazadə

Ölkə.Az