Fizika üzrə Nobel mükafatçıları açıqlanıb

7-də kimya, 9-da sülh, 12-də isə iqtisadiyyat üzrə Nobel mükafatının sahibləri məlum olacaq

Ölkə.Az xəbər verir ki, İsveçin Nobel Komitəsi 2015-ci ildə fizika üzrə mükafatın sahibinin adını açıqlayıb.

Yaponiyalı Takaaki Kadzito və kanadalı Artur Makdonald adlı alimləri "Neytrinlərin kütləsinin olduğunu göstərən neytrin rəqsləri" sahəsindəki kəşflərina görə bu nüfuzlu mükafata layiq görülüblər.

Dünən isə fiziologiya və tibb üzrə irlandiyalı Uilyam Kempbell və Yaponiyadan olan Satoşi Omura askarid parazitlərinin törətdiyi infeksiyaların müalicəsi ilə bağlı araşdırmaya, çinli Yuyu Tu isə malyariyanın müalicəsi sahəsindəki tədqiqatlarına görə Nobel mükafatını alıblar.

Oktyabrın 7-də kimya, 9-da sülh, 12-də isə iqtisadiyyat üzrə Nobel mükafatının sahibləri məlum olacaq.

Xatırladaq ki, bu il absurd elmi işlərə görə verilən Şnobel mükafatı Kaliforniya universiteti alimlərinə verilib.

Onlar qaynama zamanı toyuq yumurtasında zülalın formalaşdırılması ilə bağlı tədqiqatlar aparmağa nail olublar. Nəticəsə bişmiş yumurta çiy halına qayıdıb. Bu tədqiqata görə alimlər kimya sahəsi üzrə bu "nüfuzlu" mükafatı əldə ediblər.

Qeyd edək ki, Bəxtiyar Siracov qrup halında da olsa, bu mükafata layiq görülən ilk və hələlik yeganə azərbaycanlı kimi tarixə düşüb. 2005-ci ildə Nobel sülh mükafatı uğurlu işlərinə və dünyada sülhün təminatına görə Siracovun çalışdığı MAQATE təşkilatına verilib.

Azərbaycanda Nobel İnformasiya Mərkəzi 1996-cı ildə Nazirlər Kabinetinin xüsusi qərarı ilə yaradılıb və dünyada beşinci mərkəz sayılır. Yarandığı gündən bu yana qurum 11 nəfərin Nobel mükafatına təqdimatını verib. Onlardan ən uğurlusu Nemət Qasımov olub ki, o gizli səsvermədə amerikalı rəqibinə iki səslə uduzub.

Rəşid Mustafazadə

Ölkə.Az