Lazer şüası İstanbula enən təyyarəyə təhlükəli anlar yaşatdı - VİDEO

İzmir-İstanbul reysini həyata keçirən Türk Hava Yollarının (THY) “TK-2443” reysi ilə uçan sərnişin təyyarəsi İstanbula enərkən çətin anlar yaşayıb.

Ölkə.Az “Haberler.com”a istinadla xəbər verir ki, təyyarə naməlum şəxs və ya şəxslər tərəfindən lazer şüasına məruz qalıb.

Həmin anlar təyyarədə olan sərnişin tərəfindən mobil telefonla lentə alınıb. 

Sərnişin həmin görüntüləri sosial media hesabında paylaşıb.

"06.01.2024, “TK-2443” İzmir-İstanbul ekspedisiyası zamanı belə bir şey yaşandı", - paylaşımda qeyd olunub.

Həmçinin paylaşımda həm THY-ni, həm də İstanbul İl Polis İdarəsini etiketləyib.

Təyyarəyə yönəldilmiş lazerlər kimi diqqəti yayındıran və zərər verən işıqların birbaşa pilotun görmə qabiliyyətinə təsir etdiyi və uçuş təhlükəsizliyini riskə atdığı bildirilir. 

Mülki Aviasiya Baş İdarəsinin dərc etdiyi inzibati cərimələrə görə, təyyarələrə lazer verilməsi, hava nəqliyyatının əlaqəsinə müdaxilə edilməsi və ya uçuş təhlükəsizliyini riskə atacaq şəkildə oxşar pozuntulara yol verilməsi hallarında 91 139 TL (təx. 5 185 AZN) cərimə tətbiq edilir.

Qeyd edək ki, ABŞ-də Delta Hava Yollarına məxsus təyyarəyə lazer tuşlayan və bu cinayəti dəfələrlə törədən şəxsə həbs cəzası verilib.

Günay