Ağ Evin ciddi başağrısına çevrilən Tramp

Bayden onu zərərsizləşdirə bilməsə, Tramp rəqibini seçkidə rahatlıqla sıradan çıxaracaq. Seçki öncəsi gedən proseslər bunu deməyə əsas verir.

ABŞ-də noyabrda keçiriləcək prezident seçkiləri məcrasını dəyişir və gözlənilməz sürpriz nəticələrin olacağını vəd edir. Bu özünü prezidentliyə namizədlərin irəli sürülməsi prosesindəki praymerizmdə, yəni ilkin seçki prosesində büruzə verməkdədir. Növbəti seçkilərdə Ağ Evə rəhbərlik edəcək ən iddialı və favorit namizəd kimi keçmiş prezident Donald Tramp önə çıxmaqdadır. Əgər hakim Demokratlar onu hansısa administrativ imkanlardan istifadə edib seçki prosesindən kənarlaşdıra bilməsə, o zaman seçkidə ciddi sürprizlər gözlənilir. Buna səbəb isə noyabrın 5-də ABŞ-də prezident seçkiləri ilə bağlı Donald Trampın praymerizmdə rahatlıqla Respublikaçılar Partiyasından olan digər namizədlərə qalib gəlməsidir. Ayova ştatında keçirilən praymerizmdə Tramp Respublikaçılardan olan digər namizədləri böyük səs çoxluğu ilə üstələyib.

Açıqlanan qeyri-rəsmi məlumatlara görə, Tramp Ayova ştatında rəqibləri, ABŞ-nin BMT-dəki keçmiş daimi nümayəndəsi Nikki Heyli və Florida ştatının qubernatoru Ron DeSantisi geridə qoyaraq qalib gəlib. Heyli və DeSantisin ikinci yeri qazanmaq üçün yekun nəticələri gözlədikləri bildirilir.

İlkin nəticələrə görə, Tramp bu ştatda 51 faizdən çox səs toplayaraq yarışın qalibi elan edilib. DeSantis 21 faiz, Haley isə 19 faiz səslərin hesablanmasının ardınca gedir.

Respublikaçıların başqa bir namizədi Vivek Ramasvami isə haradasa 7-8 faiz səs qazanıb.

ABŞ-də növbəti ilkin seçkilər yanvarın 23-də Nyu-Hempşir ştatında keçiriləcək və ilkin seçki prosesi iyunun 8-dək davam edəcək.

İyul və avqust aylarında keçiriləcək partiya qurultaylarında həm Demokratlar, həm də Respublikaçılar prezident seçkiləri üçün rəsmi namizədlərini müəyyənləşdirəcəklər. Beynəlxalq analitiklər də hesab edir ki, Tramp administrativ qaydalarla seçki prosesindən kənarlaşdırılmasa, o zaman onun digər ştatlarda da ilkin seçkilərdə Respublikaçıların ən real namizədi olacağına şübhə olmayacaq.

Bunu şətrləndirən müxtəlif amillər mövcuddur. Bunlardan biri Ayova ştatında keçirilən ilkin seçkidən sonra Respublikaçı namizəd Vivek Ramasvaminin ABŞ prezidentliyi yarışından geri çəkilməsini və Donald Trampı dəstəkləyəcəyi ilə bağlı verdiyi bəyanatdır.

“Bundan sonra biz prezidentlik kampaniyasını dayandırırıq. Mənim növbəti prezident olmaq imkanım yoxdur”, - deyən Ramasvami bundan sonrakı mərhələdə Trampı dəstələyəcəyini və ona zəng etdiyini açıqlayıb. “Mən Donald Trampa zəng edərək onu qələbəsi münasibətilə təbrik etdim və onu tam dəstəklədiyimi bildirdim”, - Ramasvami qeyd edib.

Odur ki, bu gün dünyanın gözünü dikdiyi və diqqətlə izlədiyi ABŞ-də noyabr seçkiləri çox sürprizlər vəd edir.

Bu gün Ağ Evin dünyada qlobal geosiyasi proseslərə bağlı yürütdüyü siyasət də məhz bu seçkilərə hədəflənib. Rusiya-Ukrayna müharibəsindəki son durum, Yaxın Şərqdə baş verən hadisələr və gərginliyin getdikcə artması, Çin-Tayvan qarşıdurması və digər bu kimi məsələlər qarşıdakı seçkilərin bir elementi hesab etmək olar.

Daxildə baş verən prosesləri də bura əlavə etsək, o zaman mənzərə tam aydın olar. Çünki Konqresdə Respublikaçılar qarşıdakı seçkilərdə Demokratlara divident gətirəcək siyasəti, yaxud addımları ya bloklayır, ya da dəstəkləməkdən maksimum yayınaraq əngəlləməyə çalışırlar.

Bunu görən demokratlar da hər vasitə ilə onlar üçün ciddi başağrısına çevrilən Trampı sırandan çıxarmaq üçün bütün imkanlardan istifadə etməyə çalışır.

Mürtəza
Ölkə.Az