Putini "yırtıcı" adlandıran rus deputatın başına gələnlər...
Rusiyanın Ukraynaya təcavüzünün əleyhinə çıxış edən və prezident Putini tənqid edən Rusiya Federasiyası Kommunist Partiyasının (RFKP) deputatı Sergey Medvedev deputat mandantından məhrum edilib.
Ölkə.Az "59.ru"ya istinadən xəbər verir ki, deputatın mandatdan məhrum edilməsi barədə qərar yekdilliklə qəbul edilib.
Qeyd edək ki, Medvedev Perm şəhər Dumasının deputatı olub.
Perm şəhər Dumasının spikeri Dmitri Malyutin qərarla bağlı mövqeyini belə açıqlayıb:
“Bu gün bu qərarı qəbul etməyimizi vacib və aktual hesab edirəm. Dövlətimizin ideologiyasını dəstəkləməyən şəxs deputat ola bilməz. Bu gün bizim ümumi birliyimiz və ölkə rəhbərliyinin qarşıya qoyduğu məqsədlərə çatmaq üçün diqqət mərkəzində olmağımız həmişəkindən daha mühümdür”.
Sergey Medvedev eyni zamanda Kommunist Partiyası fraksiyasından xaric edilib.
Qeyd edək ki, dekabrın 31-də Sergey Medvedev şəxsi “VKontakte” səhifəsində Vladimir Putini tənqid edən, müharibə əleyhinə yazı dərc edib və hazırda yazıya giriş məhduddur. “Rusiya, oyan! Səni öldürürlər! Bunun arxasında duran canavarın yenidən seçkiyə getdiyini başa düşmək dəhşətlidir. Mən müharibənin bitməsini istəyirəm! Mən Rusiyanı Putinin buxovlarından azad görmək istəyirəm”, - deputat yazıb.
Rus mediasının yazdığına görə, yazıdan sonra Sergey Medvedev Qazaxıstana, oradan da Gürcüstana uçub. Deputat ölkəni tərk etdikdən sonra barəsində beynəlxalq axtarışa verilib.
Mürtəza
Ölkə.Az
