Birlikdə dünyanın bu ikili standartının qarşısını alacağıq

Şimali Kipr Türk Cümhuriyyətinin (ŞKTC) Prezidenti Ersin Tatar Xocalı qətliamının 32-ci ildönümü ilə bağlı müraciət dərc edib.

Ölkə.Az xəbər verir ki, bu barədə E.Tatarın Mətbuat Xidməti məlumat verib.

Prezident Ersin Tatar 1992-ci il fevralın 26-da Azərbaycanda baş verən Xocalı Soyqırımının 32-ci ildönümü ilə bağlı müraciətində qətliamın acısının hələ də hiss olunduğunu dilə gətirib. O deyib: "Bəşəriyyət və dünya tarixinə qara ləkə olan Xocalı Soyqırımında 613 azərbaycanlı qardaşımız, o cümlədən qocalar, qadınlar və uşaqlar erməni silahlı qüvvələri tərəfindən vəhşicəsinə qətlə yetirilib, yüzlərlə insan oğurlanıb, minlərlə insan əsir götürülüb".
ŞKTC prezident Tatar onu da əlavə edib ki, biz eyni millətin övladlarıyıq, bir-birimizə həmrəyliklə və sevgi ilə dünyanın bu ikili standartının qarşısını alacağıq.

“Qırğında həyatını itirənlərin xatirəsini ehtiramla yad edir, Azərbaycan xalqına ən səmimi hisslərimlə Kipr Türk xalqının həmrəyliyini və birliyini çatdırıram”, - prezident qeyd edib.
Şimali Kipr Türk Cümhuriyyəti (ŞKTC) Məclisinin sədri Zorlu Töre 1992-ci il fevralın 26-da Qarabağ bölgəsinin Xocalı şəhərində erməni əsgərlərinin törətdiyi qırğınların ildönümü ilə əlaqədar müraciət dərc edib.

Töre bildirib ki, 1992-ci il fevralın 26-da Dağlıq Qarabağ bölgəsinin Xocalı şəhərində Azərbaycan türklərinin məruz qaldığı soyqırım baş verib və 630 günahsız dinc sakin qətlə yetirilib.
Töre mesajının sonunda bütün şəhidlərə, xüsusilə də Xocalı Soyqırımında şəhid olanlara rəhmət diləyib, veteranlara sağlamlıq arzulayıb və təşəkkürünü bildirib.

ŞKTC xarici işlər naziri Tahsin Ərtoğruloğlu Xocalı faciəsi şəhidlərinin xatirəsini yad edib. “32 il əvvəl Xocalıda ermənilərin soyqırımına məruz qalmış azərbaycanlı türk qardaşlarımızın acısını qəlbimizdə daşıyırıq. Şəhidlərimizi rəhmətlə yad edirik”, - deyə o qeyd edib.

Mürtəza
Ölkə.Az