ABŞ Afrikaya hərbçilərini göndərdi

300 hərbçi Afrikada olacaq

Ölkə.Az xəbər verir ki, ABŞ "Boko Haram" islamçı ekstremist qruplaşmasına müqavimət göstərmək məqsədilə Kameruna 300 hərbçi göndərir.

Amerikalı lider bildirib ki, 90 nəfər artıq Afrika qitəsindədir, digərləri isə yaxın günlərdə göndəriləcək.

Bildirilir ki, amerikalı hərbi mütəxəssislər kəşfiyyat əməliyyatlarının təşkil edilməsi ilə məşğul olacaqlar. Hərbçilər özünümüdafiə üçün silahdan istifadə edə biləcəklər.

Xatırladaq ki, Çadın Nigeriya ilə həmsərhəd yaşayış məntəqələrin birində törədilmiş 3 partlayış nəticəsində 38 nəfər ölüb, 51 nəfər yaralanmışdı.

Terror aktlarının “Boko Haram” qruplaşması tərəfindən törədildiyi ehtimal edilirdi.

"Boko Haram" ( "Camaat’u Əhlus-Sünnə lid-Da’va vəl Cihad") Nigeriyanın radikal islam sektasıdır.

O, 2002-ci ildə Nigeriyanın şimalında Məhəmməd Yusif adlı şəxs tərəfindən yaradılıb. Təşkilatın əsas məqsədi bütün Nigeriya ərazisində şəriətin tətbiqi və Qərb həyat tərzinin silinməsidir. 2014-cü ilin may ayında BMT Təhlükəsizlik Şurası tərəfindən terror təşkilatları siyahısına salınıb.

Rəşid Mustafazadə

Ölkə.Az