Mətn ölçüsü:
  • 100%

İranlı müğənni "Qremmi" alan mahnısına görə həbs edildi

İranlı müğənni Şervin Hacıpur "Baraye" adlı mahnısına görə həbs edilib.

"Ölkə.az" xəbər verir ki, bu barədə "Alarabiya News" məlumat yayıb. Bildirilib ki, ifaçı "Qremmi" mükafatına layiq görülən mahnıya görə 3 il 8 ay müddətinə azadlıqdan məhrum edilib.

Hacıpurun özünün yazdığı mahnı 2022-ci ilin sentyabrında 22 yaşlı Məhsa Əmininin ölümündən sonra ölkədə keçirilən kütləvi etiraz aksiyalarının himninə çevrilib. Eyni zamanda bəstə bir çox ölkədə məşhurlaşıb və 2023-cü ildə "Qremmi" mükafatına layiq görülüb. Mükafatı 26 yaşlı gənc müğənniyə ABŞ prezidentinin xanımı Cill Bayden təqdim edib. 

Məhkəmə Ş.Hacıpuru “insanları iğtişaşlara təhrik etməkdə” təqsirli bilib. Bununla yanaşı, məhkəmənin qərarına əsasən, müğənni həbsdə olduğu müddətdə “ABŞ-nin insanlığa qarşı vəhşilikləri” haqqında mahnı yazmalıdır. 

Qeyd edək ki, 22 yaşlı Məhsa Əmini 2022-ci ilin sentyabrında Tehranda əxlaq polisi tərəfindən zorakılığa məruz qalıb və bir neçə saatdan sonra xəstəxanada vəfat edib. O, baş örtüyünü düzgün bağlamamaqda günahlandırılıb. Gənc qızın ölümü İranda kütləvi etiraz aksiyalarına səbəb olub.