Taliban fəallaşır, Orta Asiya həyəcan təbili çalır

Ölkə.az xəbər verir ki, Türkmənistan Əfqanıstanla olan sərhəd zolağındakı zastavaların sayını ikiqat artırıb.

Prezident Qurbanqulu Berdımuhammedovun göstərişi ilə Kuşka və Amudərya sərhəd şəhərlərində xüsusi təyinatlı polklar yaradılıb. Xatırladırıq ki, keçən həftə Türkmənistan prezidenti gözlənilmədən Daşkəndə uçub orada özbək həmkarı İslam Kərimovla görüşmüşdü. Səfərin tələsik, planlaşdırılmamış həyata keçirilməsi diqqəti məhz bu problemə yönəltdi.

Yerli KİV-lərin məlumatında iki Orta Asiya ölkəsiin rəhbərlərinin gündəmində Talibanın Əfqanıstanda fəallaşması məsələsi olub. Müzakirələrdən sonra yayılan xəbərlərdə bildirilir ki, Özbəkistan Türkmənistana sərhədlərin qorunması məsələsində yardım edəcək. Çünki İslam Kərimov Talibanın fəallaşmasının yalnız Türkmənistan üçün deyil, həm də Özbəkistan üçün ciddi təhlükə olduğunu gözəl anlayır.

Analitiklərin fikrincə İslam Kərimovun narahatlığına digər sübut isə Əfqanıstanda Daşkənd tərəfindən dəstəklənən özbək general Abdurrəşid Dustumun siyasi arenada son vaxtlar daha da fəallaşmasıdır.

Qeyd edək ki, Talibanın bu yaxınlarda 300 minlik əhalisi olan Gündüz şəhərini qısa bir müddətdə, həm də demək olar ki, döyüşsüz ələ keçirməsi Orta Asiya ölkələrinin siyasi elitasını qorxuya salmışdı.

Ölkə.az