Ukrayna ordusu Rusiya bölgələrinə keçdi - VİDEO

Ukrayna tərəfindən vuruşan “Rusiya Könüllülər Korpusu” və “Rusiyanın Azadlığı” təşkilatının döyüşçüləri Rusiya sərhədini yararaq Belqorod və Kursk vilayətinin ərazisinə hücuma keçiblər.

Ölkə.Az xəbər verir ki, bu barədə məlumatı Rusiya Müdafiə Nazirliyi  təsdiqləyib. 

Bildirilir ki, martın 11-dən 12-nə keçən gecə bir neçə diversiya qrupu Ukraynadan dövlət sərhədini keçərək Belqorod və Kursk vilayətlərində Rusiya ərazisinə daxil olub.

Verilən məlumatlara görə, kiçik qruplar şəklində Rusiya ərazisinə daxil olan döyüşçülərlə Belqorod vilayətinin Şebekinski, Qrayvoronski rayonlarında və Kursk vilayətinin Tyotkino kəndi ərazisində toqquşmalar baş verib.

RF Müdafiə Nazirliyinin məlumatında isə deyilir ki, səhər saat üç radələrində mülki obyektlərin intensiv atəşə tutulmasından sonra Ukrayna terrorçu birləşmələri tankların və zirehli döyüş maşınlarının dəstəyi ilə Rusiya Federasiyası ərazisini işğal etməyə cəhd göstərib.

“Görülən tədbrilər nəticəsində Ukrayna ilə həmsərhəd olan Belqorod vilayətinin Qrayvoronski rayonunun Spodaryuşino kəndi ərazisində hücum edən diversiya-kəşfiyyat qrupları məhv edilib.

Əks-hücum zamanı Ukrayna tərəfi 100-dən çox canlı qüvvə, 6 tank və 20 zirehli texnika itirib”, - məlumatda bildirilir.

Mürtəza
Ölkə.Az