İsrailin zərbəsi nəticəsində iranlı diplomatlar ölüblər - YENİLƏNİB

"Hücumda bir neçə iranlı diplomat və hərbi müşavir həlak olub. Onların adları daha sonra açıqlanacaq".

APA xəbər verir ki, bu barədə İranın Suriyadakı səfiri Hüseyn Əkbəri bildirib.

Onun sözlərinə görə, "İsrailin bu hərəkəti İranın qəti cavabı ilə nəticələnəcək".

"Hələlik dağıntıların tam təmizlənməsi aparılmayıb və 5-7 nəfərin öldüyünü düşünürük. Dəqiq rəqəmlər daha sonra açıqlanacaq", - deyə o bildirib.

Diplomat qeyd edib ki, iki polis də öldürülüb, hazırda adları açıqlanmayıb.

İran Xarici İşlər Nazirliyinin məlumatına görə, nazir Hüseyn Əmir Abdullahian suriyalı həmkarı ilə telefon danışığında deyib ki, İranın Dəməşqdəki səfirliyinin konsulluq binasına edilən hücuma görə bütün məsuliyyət İsrailin üzərinə düşür.

***

İsrailin hava hücumu nəticəsində Dəməşqdəki İran konsulluğunun binası tamamilə dağılıb.

İran səfiri Hüseyn Əkbərinin və ailəsinin zərbə nəticəsində xəsarət almadığı bildirilib.

Qeyd edək ki, İsrail Hərbi Hava Qüvvələri Suriyanın paytaxtının qərbində, SEPAH-dan (İran İnqilab Keçişçiləri Korpusu - red.) olan iranlı hərbi məsləhətçilərin yaşadığı Mezze məhəlləsinə raket zərbələri endirib.

Zərbələr nəticəsində SEPAH Hərbi Hava Qüvvələrinin sabiq komandanı, general Məhəmməd Rza Zahedi öldürülüb. 

Rəsmi Tehran hələlik məlumatı təsdiqləməyib.