Ermənistan Azərbaycan və Türkiyədən... - Erməni politoloqlardan SENSASİYA

"Brüssel görüşündə hərraca çıxarılan Ermənistanın başlanğıc qiyməti açıqlanıb: 336 milyon dollar".

Ölkə.Az xəbər verir ki, bunu erməni politoloq Arman Abovyan  deyib.

“Məncə, önəmli olan pulun miqdarı deyil, ölkəmizin hərraca çıxarılması və həmin pulların qrant şəklində infrastruktur və yaşıl enerjidə hansı istiqamətlərə veriləcəyidir”, - o qeyd edib.

Onun sözlərinə görə, pul Ermənistanın həyati maraqları üçün deyil, Ermənistanı Rusiya ilə əlaqəsini kəsərək Türkiyə və ya Azərbaycandan tamamilə asılı vəziyyətə salmaq üçün verilir:

“Ermənistanı mərhələli şəkildə enerji müstəqilliyindən məhrum etmək üçün atom elektrik stansiyası və Zəngəzur dəhlizinin açılması və s. - yəni bu, elan edilən hərracın son nöqtəsi olacaq”.

Aİ və ABŞ regiondakı maraqları barədə mövqeyini açıqlayan Abovyan deyib ki, Qərbin regionda məqsədi İranın, Rusiyanın və Çinin regionda təsirini azaltmaqdır. "Bütün addımlar bu məqsədə yönəlib", - o qeyd edib. 

Bu görüşün Azərbaycana qarşı yönəlib-yönəlməməsi ilə bağlı məsələyə aydınlıq gətirən politoloq deyib ki, Azərbaycana təzyiq etmək problemi olsaydı, Avropanın təsirli alətləri vardı: "Azərbaycana qarşı sanksiyalar tətbiq edilərdi. Bu edilməyib və edilməyəcək də”.

Digər  erməni politoloq Suren Surenyants da  Ermənistanın hərraca çıxarılması və ona verilən qiymətlə bağlı mövqeyini açıqlayaraq aşağıdakıları qeyd edib: 

“Bu söz-söhbətlər havadan yayılmayıb, amma məndə olan dəqiq məlumata görə, ötən həftənin sonunda Nikol Paşinyan psevdoqərb seqmentinin qondarma ekspertləri ilə görüşüb və həmin görüşdə bu rəqəmi o özü də tirajlayıb. Yəni o, öz rejiminin hakimiyyətinin sabitliyini təmin etmək üçün x (iks) məbləğində pul alır, çünki gələcəkdə Ermənistan-Azərbaycan münasibətlərində, Rusiya ilə münasibətlərdə çox çətin qərarlar qəbul etməli olacaq. Amma ayrılacaq 350 milyon elə də böyük pul deyil".

Onun sözlərinə görə, Rusiya qazın qiymətini qaldırmaq qərarına gəldiyi üçün iqtisadi mühitin pisləşməsi, geosiyasi münaqişənin diqqət mərkəzində olması və yaxud üçüncü ölkənin təcavüzü  nəticəsində bu puldan əsər əlamət qalmayacaq.

"Yəni belə qanlı ssenarilər çoxdur, biz bunu dünyanın müxtəlif ölkələrində görmüşük. Ukraynada necə olub, Gürcüstanda necə olub, keçmiş Yuqoslaviyada və ya Serbiyada necə olub. Yəni bununla bağlı çox zəngin təcrübə var”, -  Suren Surenyants deyib.

Mürtəza
Ölkə.Az