Depardyenin yeni planları üzə çıxdı

Depardyenin macəraları davam edir

Ölkə.Az xəbər verir ki, məşhur aktyor Jerar Depardye Moskvada onun sevimli yeməklərini təqdim edən restoran açacaq.

Yayılan məlumatlara əsasən, bundan sonra aktyor bestseller olacağını iddia edən yeni kitab buraxacaq. "Günahsız" adlanacaq kitab Rusiyaya həsr olunacaq və bu əsərdə Rusiya Federasiyası prezidenti Vladimir Putinlə aparılmış söhbətlər, Krım səfəri, Ukrayna-Rusiya münasibətlərinə yer veriləcək.

Jerarın yaxın dostu Arno Frille jurnalistlərə aktyorun planlarından danışaraq qeyd edib ki, yeni kitab təkcə Rusiyada yox, həm də dünyada səs-küyə səbəb olacaq.

Xatırladaq ki, bir müddət öncə aktyor Jerar Depardye Belarus prezidenti Aleksandr Lukaşenkonun qonağı olub. Kənd həyatı haqqında söhbət edən prezidentlə aktyor daha sonra otlaq sahəsinə baş çəkiblər.

Sonra prezident əlinə dəryaz alaraq aktyora ot biçməyi öyrədib. Onlar gəzintilərini traktor sürməklə davam etdiriblər.

Qeyd edək ki, Depardye karyerası ərzində 180-dən çox filmdə çəkilib. Bu filmlərdən bir çoxu Fransa kinosunun inciləri sırasına daxil olub. Depardye həm də aktiv kommersiya fəaliyyəti ilə məşğuldur. O, neft yataqlarının istismarı, çoxsaylı şərab təsərrüfatları və Parisdəki iki restoranının fəaliyyəti ilə bağlı işlərini davam etdirir.

2008-ci il oktyabrın ortalarında aktyorun 4 uşağından biri - onun davamçısı və gözəl aktyor Qiyom Depardye gözlənilmədən vəfat edib. Maraqlıdır ki, ata və oğul Depardye arasında uzun müddət münaqişə olub. Lakin son vaxtlar onlar barışıblar və qəfil ölüm onları həmişəlik ayırıb. Depardye oğlunun ölümünü çox ağır keçirib. O, yubiley günlərində heç bir telekanala müsahibə verməyib.

3 yanvar 2013-cü ildə Rusiya prezidenti Vladimir Putin Jerar Depardyeyə Rusiya vətəndaşlığı verilməsi haqqında fərman imzalayıb.

Rəşid Mustafazadə

Ölkə.Az