Putin prezident administrasiyasının yeni tərkibini formalaşdırdı - ADLAR

Vladimir Putin prezident administrasiyasının yeni tərkibini müəyyən edib.

Ölkə.Az xəbər verir ki, Rusiya lideri bununla bağlı sərəncam imzalayıb. 

Sərəncama əsasən Anton Vayno yenidən prezident administrasiyasının rəhbəri, Aleksey Qromov və Sergey Kiriyenko administrasiya rəhbərinin birinci müavinləri, əvvəllər dövlət başçısının köməkçisi olan Maksim Oreşkin də müavini təyin edilib. Oxşar vəzifəni Vladimir Ostrovenko, Dmitri Kozak və Maqomedsalam Maqomedov tutublar.

Dmitri Peskov prezident administrasiyası rəhbərinin müavini olmaqla yanaşı, prezidentin mətbuat katibi vəzifəsini saxlayıb.

Putin həmçinin Tula vilayətinin keçmiş qubernatoru Aleksey Dyumini və Təhlükəsizlik Şurasının keçmiş katibi Nikolay Patruşevi özünə köməkçi təyin edib. 

Prezident həmçinin əvvəlki köməkçiləri olan Vladimir Medinski, Dmitri Mironov, Yuri Uşakov, Andrey Fursenko, Ruslan Edelgeriyev, Larisa Brıçeva, Dmitri Kalimulin və Dmitri Şalkovu yenidən öz vəzifəsində saxlayıb.

Putin yerlərdəki səlahiyyətli nümayəndələrini də öz vəzifəsində saxlayıb.

Prezidentin sərəncamına əsasən Anton Kobyakov, İqor Levitin və Valeri Fadeev prezidentin müşaviri olublar. 

Sərəncama əsasən yeni administrasiyaya prezidentin keçmiş müşavirləri Vladimir Tolstoy və Aleksandra Levitskaya daxil edilməyib. 

Artur Muravyov Prezidentin Federasiya Şurasında, Harri Mink Dövlət Dumasına, Aleksandr Konovalov isə Konstitusiya Məhkəməsində səlahiyyətli nümayəndəsi təyin edilib. 

Qeyd edək ki, mayın 7-də Putin beşinci dəfə Rusiya prezidenti vəzifəsinin icrasına başlayıb. 

Mürtəza
Ölkə.Az