Çernoqoriyada iğtişaşları Rusiya təşkil edib?

"Rusiya serbiyalı millətçilərlə birlikdə Çernoqoriyada hakimiyyətin devrilməsinə yönəlmiş çıxışlarda iştirak edir"

Ölkə.Az xəbər verir ki, bunu "HRT" nəşrinə müsahibəsində Çernoqoriyanın baş naziri Milo Cukanoviç deyib.

"Heç bir şübhə yoxdur ki, Rusiya Podqoritsedə hökumətə qarşı etirazların təşkilində aktiv rol oynamağa davam edir", - deyə Cukanoviç əlavə edib.

O qeyd edib ki, vəzifəsini tərk etmək niyyətində deyil.

Xatırladaq ki, 24 oktyabrda Çernoqoriya polisi paytaxtda parlament binasının qarşısında toplaşmış müxalifət tərəfdarlarına qarşı gözyaşardıcı qaz və səs bombalarından istifadə edib. 15 polis əməkdaşı və 24 mülki şəxs tibbi yardım üçün müraciət edib.

Etirazçılar 1991-ci ildən hakimiyyətdə olan baş nazir Milo Cukanoviçin istefası, keçid hökumətin formalaşdırılması və erkən seçkilərin keçirilməsini tələb edir. Bundan əlavə, aksiya iştirakçıları ölkənin NATO-ya üzv olmaması üçün çıxış ediblər.

Ötən ay ABŞ Çernoqoriya rəhbərliyinin islahatlar kursunu davam etdirəcəyi halda ölkənin NATO-ya daxil olmasını dəstəkləməyə hazır olduğunu bəyan edib.

Co Bayden Çernoqoriyanın baş naziri Milo Cukanoviçlə telefon danışığında bildirib ki, rəsmi Vaşinqton bu dekabrda ölkənin NATO-ya dəvətini dəstəkləməyə hazırdır. Çernoqoriya alyansa üzv olmaqla bağlı dəvəti dekabr ayında NATO-ya daxil olan ölkələrin xarici işlər nazirlərinin görüşündə alacaq.

Bir il öncə isə alyans NATO-ya üzvlüklə bağlı Çernoqoriya ilə intensiv danışıqlara başlamağı qərara almış, ancaq dəvət haqqında qərar 2015-ci ilin sonuna qədər təxirə salınmışdı.

Rəşid Mustafazadə

Ölkə.Az