Makron iğtişaşlar fonunda Yeni Kaledoniyaya gedib - FOTO

Fransa prezidenti Emmanuel Makron iğtişaşlardan sonra Sakit okeandakı Yeni Kaledoniya adalarına gedib.

Ölkə.Az xəbər verir ki, “France info”nun məlumatına görə, dövlət başçısını səfərdə müdafiə naziri Sebastien Lekornu, daxili işlər naziri Jerald Darmanin və xarici ərazilər naziri Mari Quevenu müşayiət edir.

Makronun adalara səfəri cəmi bir gün davam edəcək. Səfər çərçivəsində Makron yerli seçilmiş rəsmilər və “Yeni Kaledoniyada vətəndaş cəmiyyətinin nümayəndələri” ilə görüşməlidir. Bu səfər tərəflər arasında dialoqun bərpası üçün zəruri hesab olunur.

Yeni Kaledoniyada etirazlar may ayında adalarda yaşayan fransızların səsvermə hüquqlarını genişləndirən qanun layihəsinə görə başlayıb. Sənədin əleyhdarları hesab edirlər ki, bu, yerli əhalinin səsvermə qabiliyyətini zəiflədə və Parisin təsirini artıra bilər.

Aprelin əvvəlində qanun layihəsi Fransa Senatı, mayın 14-də isə Fransa Milli Assambleyası (parlamentin aşağı palatası) tərəfindən təsdiqlənib. Yekun təsdiq iyunun əvvəlinə planlaşdırılır.
Adalarda etirazlar iğtişaşlara, qırğınlara və polislə toqquşmalara çevrilib. Son məlumatlara görə, iki fransız polisi də daxil olmaqla altı nəfər həlak olub. 300-dən çox insan yaralanıb. 
Fransa hakimiyyəti adaya silahlı qüvvələri yerləşdirib və fövqəladə vəziyyət elan edib.

Yeni Kaledoniya 1853-cü ildən Fransa müstəmləkəsi hesab olunur. 2018-2021-ci illərdə adalarda üç referendum keçirilib və bu referendumda sakinlərin əksəriyyəti Fransanın tərkibində qalmağa qərar verib. Sonuncu səsvermə yerli əhalinin nəsilləri tərəfindən boykot edilib.

Mürtəza
Ölkə.Az