İsrail - HƏMAS mümkün razılaşmasının təfərrüatı açıqlandı

İsrail və Fələstinin radikal HƏMAS hərəkatı arasında bağlana biləcək müqavilənin şərtləri altı həftəlik atəşkəs və Qəzza zolağının bütün məskunlaşmış ərazilərindən qoşunların çıxarılmasını nəzərdə tutur.

Bu barədə ABŞ Prezidenti Co Bayden Ağ Evdə Yaxın Şərqdəki vəziyyətlə bağlı qısa çıxışı zamanı bildirib.

Baydenin sözlərinə görə, İsrailin yeni təklifləri Qətər nümayəndələri tərəfindən HƏMAS-a çatdırılıb və onlar gərginliyin həllinin üç mərhələsini əhatə edir. "Birinci mərhələ tam atəşkəs, İsrail qoşunlarının Qəzzanın bütün məskunlaşmış bölgələrindən çıxarılması, qadınların, qocaların, yaralıların da daxil olduğu bir sıra girovların azad edilməsini və bunun müqabilində yüzlərlə fələstinli məhbusun sərbəst buraxılmasını əhatə edəcək.", - ABŞ prezidenti bəyan edib.

Bayden vurğulayıb ki, razılaşmaların ikinci mərhələsi "sağ qalan bütün girovların, o cümlədən kişi hərbçilərin" azad edilməsini, İsrail qoşunlarının Qəzza zolağından çıxarılmasını və "daimi atəşkəs"i nəzərdə tutur. Razılaşmaların üçüncü mərhələsi Qəzza zolağının yenidən qurulmasından ibarətdir.