ABŞ-də təcili yardım xəttində nasazlıq - milyonlarla insan ZƏRƏR ÇƏKDİ

ABŞ-nin Massaçusets ştatında sistem nasazlığı səbəbindən 911 təcili yardım xəttinə təxminən 3 saat ərzində daxil olmaq mümkün olmayıb. 

Sfera.az xəbər verir ki, səbəbi hələ məlum olmayan müvəqqəti nasazlıqdan milyonlarla insan zərər çəkib.

Massaçusets İctimai Təhlükəsizlik və Təhlükəsizlik Ümumi Müdirliyinin Kommunikasiya və Siyasət Direktoru Elaine Driscoll mövzu ilə bağlı verdiyi açıqlamada nasazlığın yerli vaxtla saat 13:00 radələrində hüquq-mühafizə orqanları tərəfindən aşkar edildiyini söyləyib.

Səlahiyyətlilər bölgə sakinlərini köməyə ehtiyac duyduqları təqdirdə birbaşa yerli polis, yanğınsöndürmə və səhiyyə idarələrinə müraciət etməyə çağırıb. 

Massaçusets Ştat Polisindən verilən açıqlamada nasazlığın saat 15:49 radələrində aradan qaldırıldığı bildirilib.

Xatırladaq ki, keçən aprel ayında da ABŞ-nin Nebraska, Nevada, Cənubi Dakota və Texas ştatlarında 911 təcili yardım nömrəsinə çıxışda müvəqqəti fasilələr yaranmışdı. Qısa müddət sonra aradan qaldırılan nasazlıqlarla əlaqədar Federal Rabitə Komissiyası araşdırmaya başlayıb.