Bəzi ərəb ölkələrindən Türkiyəyə xəyanət

Türkiyə Qəzzadakı hərbi əməliyyatlara etiraz olaraq İsraillə ticari əlaqələrini kəssə də, bəzi ərəb ölkələri əksinə olaraq əvvəlki illərlə müqayisədə bu ölkə ticari əlaqələrini daha da inkişaf etdirib.

Ölkə.Az xəbər verir ki, ingilislərə məxsus "Middle East Eye"nin yazdığına görə, Misir, Birləşmiş Ərəb Əmirlikləri, İordaniya İsraillə ticari əlaqələrini genişləndiriblər.

Nəşr İsrail Mərkəzi Statistika Bürosunun məlumatına istinad edərək yazıb ki, İsrailin 2023-cü ilin oktyabr ayından Qəzzaya hücumuna baxmayaraq, bəzi ərəb ölkələri İsrailə ixracatını artırıb.

Misirin İsrailə ixracı 2024-cü ildə iki dəfə artaraq 25 milyon dollara çatıb. Birləşmiş Ərəb Əmirliklərindən İsrailə ixrac da 2023-cü illə müqayisədə artaraq 2024-cü ilin may ayında 242 milyon dollara çatıb.

İordaniyadan İsrailə ixrac da 2023-cü illə müqayisədə bir qədər artaraq 2024-cü ilin mayında 35,7 milyon dollar təşkil edib.

Lakin Türkiyənin Qəzzada müharibəyə cavab olaraq tətbiq etdiyi ixrac məhdudiyyətləri nəticəsində İsrailə ixracat 3 dəfəyədək azalıb. Əgər 2023-cü ilin ilk 4 ayında İsrailə ixracatın həcmi 376,6 milyon dollar olmuşdusa, 2024-cü ilin may ayında Türkiyədən İsrailə ixracatın həcmi 116,8 milyon dollara düşüb.

Nəşr onu da qeyd edib ki, Misir, BƏƏ və İordaniya yaranmış vəziyyətdən istifadə etməkə İsraillə ticarətdən iqtisadi fayda əldə etməyə çalışırlar. Regional ticarət dinamikasının gələcəyi İsrail-Fələstin münaqişəsinin gedişindən və bölgədəki siyasi proseslərdən asılı olacaq.

Nəşr sonda onu da qeyd edib ki, bu yolla bəzi ərəb ölkələri Türkiyəyə İsraillə ticari əlaqələrində yaranmış fürsətdən istifadə edib onun yerini tutmağa çalışırlar. Bununla yanaşı, Qəzza məsələsində həm İsrailə qarşı beynəlxalq təzyiqin əhəmiyyətini azaldırlar, həm də bu məsələdə İslam həmrəyliyini pozub Türkiyəyə arxadan zərbə vururlar.

Mürtəza
Ölkə.Az