Dağıstandakı terror aktlarında ölənlərin sayı artıb - YENİLƏNİB
Mahaçqala və Dərbənddə baş verən hücumlar nəticəsində ölənlərin sayı artıb.
“Report” xəbər verir ki, bu barədə Dağıstan müftiliyi məlumat yayıb.
Qeyd olunub ki, terror aktları nəticəsində 9 nəfər həlak olub, onlardan yeddisi hüquq-mühafizə orqanlarının əməkdaşlarıdır. Silahlı hücumlarda 25 nəfər xəsarət alıb.
***
Dağıstanda hüquq-mühafizə orqanlarının 6 əməkdaşı həlak olub, 12-si yaralanıb.
APA-nın Rusiya bürosu xəbər verir ki, bununla bağlı Rusiya Federasiyası Daxili İşlər Nazirliyi məlumat yayıb.
Qeyd edək ki, Dağıstanın paytaxtı Maxaçqalada terrorçular polisə hücum edib.
Rusiya Milli Antiterror Komitəsi Respublika ərazisində əksterror əməliyyatı rejiminin tətbiq olunduğunu açıqlayıb.
***
Dərbənddə kilsəyə hücum zamanı bir keşiş və kilsə mühafizəçisi həlak olub.
APA-nın Rusiya bürosu xəbər verir ki, bu barədə RBK məlumat yayıb.
Qeyd edək ki, Dərbənddə naməlum şəxslər pravoslav kilsəsinə və sinaqoqa hücum ediblər.
***
Rusiyanın Dərbənd şəhərində naməlum şəxslər sinaqoq və kilsəni avtomat silahlardan atəşə tutub, bir polis əməkdaşı həlak olub, biri isə yaralanıb.
"Report" xəbər verir ki, bu barədə Dağıstanın Daxili İşlər Nazirliyi məlumat yayıb.
“Təxminən saat 18:00-da (Bakı vaxtı ilə 19:00- Qeyd) Dərbənddə naməlum şəxslər sinaqoq və kilsəni avtomat silahlardan atəşə tutub. İlkin məlumata görə, bir polis əməkdaşı həlak olub, biri isə yaralanıb. Şübhəlilərin qaçdığı avtomobil müəyyən edilib. Ölən və yaralanan polis əməkdaşları ilə bağlı məlumatlar dəqiqləşdirilir”, – məlumatda vurğulanıb.
Hazırda sinaqoqda yanğın baş verib. Yanğının söndürülməsi üçün işlər görülür.
