Korrupsiyada ittiham olunan məşhur ermənipərəst ABŞ senatoru istefa verir

Tanınmış ABŞ senatoru, Xarici Əlaqələr Komitəsinin keçmiş rəhbəri Bob Menendes Misir hökumətində işləmək ittihamı ilə korrupsiya işində mühakimə olunduqdan sonra istefa ərizəsini təqdim edib.

Ölkə.Az "Reuters"ə istinadən xəbər verir ki, rüşvətxorluq və Misir hökumətinin agenti kimi fəaliyyət göstərməkdə ittiham olunan iş üzrə təqsirli hökmündən sonra Menendes partiya üzvlərinin təzyiqi ilə istefa verdiyini açıqlayıb.

İyulun 16-da Manhetten federal məhkəməsində münsiflər heyəti 9 həftəlik məhkəmə prosesindən sonra senatoru ona qarşı irəli sürülən 16 ittihamın hamısında təqsirli bilib. İşdə iştirak edən digər iki nəfər də təqsirli bilinib.

Menendesin agentlik tərəfindən nəzərdən keçirilən məktubunda o, avqustun 20-dən etibarən senator vəzifəsindən istefa verəcəyini bildirib.

Qeyd edək ki, Menendes ABŞ-də ermənipərəst mövqeyi ilə seçilən, erməni lobbisi ilə sıx təmaslarda olan və lobbi tərəfindən maliyyələşən senator olub.

Xatırladaq ki, Avropa Parlamentinin əvvəlki vitse-prezidenti Eva Kili və Avropa Parlamenti ilə əlaqəli bir sıra digər şəxslər Qətərin xeyrinə lobbiçilik etməkdə şübhəli bilinərək istintaqa cəlb olunublar.

Mürtəza
Ölkə.Az