Qasım Süleymaninin qızı Tehran merinə qarşı: "Əgər nüfuz itirilirsə, legitimlik də bir işə yaramır"
Son günlər İslam İnqilabı Keşikçiləri Korpusunun (SEPAH) "Qüds" qüvvələrinin keçmiş komandanı general Qasım Süleymaninin böyük qızı Nərcis Süleymaninin Tehran şəhərinin meri Əlirza Zakaniyə qarşı çıxışları və bunun siyasi səhnədə doğurduğu reaksiyalar İran gündəminin əsas mövzularından birini təşkil edir.
Oxu.Az "Azad İran" "YouTube" kanalına istinadən xəbər verir ki, bu mövzu İran mətbuatında geniş şəkildə işıqlandırılmaqda və sosial şəbəkələrdə qızğın müzakirə olunmaqdadır.
Qeyd olunub ki, həmin müzakirələr İran cəmiyyətinin yetərincə parçalanmış və qütbləşmiş durumda olduğunu aydın surətdə nümayiş etdirir.
İyulun 14-də Tehran Şəhər Şurasının üzvü və həmin şuranın hüquq komissiyasının sədri olan Nərcis Süleymani qurumun iclasında meriyanın fəaliyyətini ciddi tənqid edib və Əlirza Zakaninin mer postunu tutduğu üç il ərzində şəhərin vəziyyətində hər hansı irəliləyişin olmadığını, verilmiş vədlərdən hətta birinin belə yerinə yetirilmədiyini vurğulayıb. Prezident seçkiləri dövründə, merin və yaxın ətrafının iş başında olmadığı zaman kəsiyində şəhərin daha yaxşı idarə olunduğunu vurğulayan Nərcis Süleymani Tehrana gündə bir vəzifəyə göz dikən şəxsin deyil, şüarçı olmayan, sakitcə işini görən bir insanın rəhbərlik etməli olduğunu bəyan edib.
O, mer postunu daşımaq üçün iki məsələnin - nüfuz və legitimliyin önəmli olduğunu qeyd edərək, "əgər nüfuz itirilirsə, legitimlik də bir işə yaramır", - deyə bildirib.
