Yeni müharibə 4 trilyon dollara başa gələcək

Cənubi Koreya ilə Şimali Koreya (KXDR) arasında tammiqyaslı münaqişə milyonlarla insanın ölümünə səbəb olacaq və hərbi əməliyyatların ilk ilində qlobal iqtisadiyyata 4 trilyon dollara başa gələcək. 

Ölkə.Az xəbər verir ki, bu barədə "Bloomberg" yazır. 

Nəşrin yazdığına görə, bu, Rusiya ilə Ukrayna arasında münaqişənin qlobal iqtisadiyyata vurduğu zərərdən iki dəfə çoxdur.

"Bloomberg" dünya iqtisadiyyatına dəyəcək ziyanın həcminin bu qədər çox olmasının səbəbini Cənubi Koreyanın yüksək texnologiyalı məhsulların əsas təchizatçılarından biri olduğu ilə izah edib.

"Təkcə "Samsung" dünya üzrə DRAM çiplərinin 41%-ni və NAND yaddaş çiplərinin 33%-ni istehsal edir. Ümumilikdə Cənubi Koreya dünya üzrə fabriklərdə istifadə olunan elektron komponentlərin dünya istehsalının 4%-ni və bütün yaddaş çiplərinin təxminən 40%-ni istehsal edir. Şimali Koreya isə Cənubi Koreyanın istehsal gücünün yarısını və demək olar ki, bütün mikroçip istehsalını məhv edə bilən raketlərə malikdir. 

Bundan əlavə, yarımada ətrafındakı sular vasitəsilə Çin, Yaponiya və Rusiyaya dəniz daşımaları qeyri-mümkün olacaq. Və münaqişədə iştirak edən əsas tərəflər ABŞ və Çin olacaq.

Bütün bu amilləri nəzərə alsaq, müharibə Cənubi Koreyanın ÜDM-nin 37,5%, Çinin ÜDM-nin 5% azalmasına, ABŞ-nin ÜDM-in 2,3%-ni itirməsinə səbəb olacaq", - "Bloomberg" yazıb.

Mürtəza
Ölkə.Az