Norveç Rusiyaya qarşı sanksiyalara qoşuldu

Norveç krallığı Rusiyaya qarşı tətbiq edilmiş sonuncu sanksiyalar paketinə qoşulub

Ölkə.Az Norveçin XİN-in mətbuat xidmətinə istinadən bildirir ki, krallıq Rusiyaya qarşı Avropa İttifaqının 12 sentyabr tarixində təsdiq etdiyi iqtisadi sanksiyalar paketinə qoşulub.

Norveçin xarici işlər naziri Berqe Brende açıqlamasında söyləyib ki, Rusiya beynəlxalq təzyiqə baxmayaraq Ukraynaya münasibətdə yürütdüyü kursu dəyişməyə hazırlığını nümayiş etdirməyib.

"Rusiyanın Ukraynadakı əməlləri hələ də ciddi narahatlıq doğurur. Sülh az da olsa qorunur, lakin Rusiya beynəlxalq birliyin irəli sürdüyü tələbləri, o cümlədən, Ukrayna ərazisindən bütün hərbi texnikanın çıxarmasını yerinə yetirməyib. Rusiya beynəlxalq təzyiqə baxmayaraq Ukraynaya münasibətdə yürütdüyü kursu dəyişməyə hazırlığını nümayiş etdirməyib", - deyə nazir bildirib.

Norveç Avropa İttifaqının üzvü deyil, lakin tədricən Rusiyanın fiziki və hüquqi şəxslərinə qarşı yönəlmiş bütün sanksiyalara qoşulur.

Xatırladaq ki, 12 sentyabrda Avropa İttifaqı sanksiyalara düşmüş rusiyalı hüquqi və fiziki şəxslərin, o cümlədən, şirkətlərin "qara siyahısını" tərtib edib.

Onların sırasında, "Газпром нефть", "Роснефть", "Транснефть", "Оборонпром",  "Уралвагонзавод" və digərləri yer alıb.

Rəşid Mustafazadə

Ölkə.Az