Rusiyalı müğənni: Türkiyəli kəşfiyyatçılar çox əzəmətli və gözəl idilər, ətir qoxuyurdular - FOTO
Ankarada ABŞ və Rusiya arasında məhbus mübadiləsində ekstradisiya edilənlərdən biri də rusiyalı müğənni Saşa Skaçilenko olub.
Ölkə.Az Türkiyə mətbuatına istinadla xəbər verir ki, müharibə əleyhdarı rusiyalı müğənni Almaniya mətbuatına əsir mübadiləsindən danışıb.
O, son ana qədər onlara heç bir məlumat verilmədiyini bildirib:
Ankaranın Esenboğa hava limanında baş verənlər barədə danışan müğənni gördükləri qarşısında təəccübləndiyini deyib. Skaçilenko Türkiyənin Milli Kəşfiyyat İdarəsinin (MİT) əməkdaşlarının seriallardakı personajlara bənzədiyini söyləyib:
“Uzun müddət hara getdiyimizi demədilər. Öləcəyimizi düşünməyə başladım. Təyyarə vurulacaqmı deyə düşünürdük. Hadisələr o qədər qəfil baş verdi ki, hamımız şokda idik. Nəhayət, Ankaraya enəndə rahatladıq. Bizi qarşılayan türklər serialdakı personajlar kimi idilər. Hamısı qara kostyumda, ciddi və çox müasir görünüşlü idilər. Onlardan ətir qoxusu gəlirdi. Hər tərəfə ətir qoxusu yayılmışdı. Qulaqlıqları və əzəmətli duruşları ilə bizimkilərdən çox fərqli idilər. Çox gözəl görünürdülər və inanılmaz təsiredici bir an idi”.
Qeyd edək ki, Saşa Skaçilenko 2022-ci ildə Ukraynanın işğalına etiraz əlaməti olaraq Rusiyanın iri supermarketlərində məhsulların üzərinə etiket yapışdırıb. O, Ukraynanın işğalından dərhal sonra qəbul edilən dezinformasiya cinayəti çərçivəsində Rusiya ordusu ilə bağlı etibarsız yalan məlumat paylaşdığı iddiası ilə 7 il həbs cəzasına məhkum edilib.
Xatırladaq ki, ötən həftə Türkiyədə Milli Kəşfiyyat İdarəsi ABŞ, Almaniya, Polşa, Sloveniya, Norveç, Rusiya və Belarus həbsxanalarında saxlanılan 26 nəfərin qarşılıqlı mübadiləsini əhatə edən əməliyyat həyata keçirib.
Əməliyyat çərçivəsində ikisi uşaq olmaqla 10 nəfər Rusiyaya, 13 nəfər Almaniyaya, 3 nəfər isə ABŞ-yə təhvil verilib.
Bu, İkinci Dünya Müharibəsindən sonrakı ən böyük əsir mübadiləsi olaraq tarixə düşüb.
Billurə Yunus
