Türkiyə İŞİD-ə qarşı quru əməliyyatlarına başlayır

Əməliyyatın harada keçiriləcəyi dəqiqləşdirilmir.

Ölkə.Az Oxu.Az-a istinadən xəbər verir ki, Türkiyənin xarici işlər naziri Feridun Sinirlioğlu Ankaranın “İslam Dövləti” (İŞİD) terror qruplaşmasına qarşı yaxın günlərdə hərbi əməliyyata başlamaq planlarını bəyan edib.

“Biz İŞİD-ə qarşı yaxın günlərdə əməliyyata başlamağı planlayırıq. Biz bu problemi həll edəcəyik. Bununla paralel Suriya məsələsi də öz həllini tapacaq. Bu problem demokratik prinsiplər çərçivəsində həll edilməlidir”, - Sinirlioğlu Erbildə, Şimali İraqa səfəri zamanı “Yaxın Şərqin gələcəyi” adlı konfransda çıxış edərkən bəyan edib.

Nazir əməliyyatın məhz harada keçiriləcəyini və bu əməliyyatda quru qoşunlarının iştirak edib-etməyəcəyini dəqiqləşdirməyib. Sinirlioğlu İŞİD-in Türkiyəyə qarşı terror aktları həyata keçirdiyini xatırladıb, və əlavə edib ki, Ankara İraq və onun kürd muxtariyyətinə terror təşkilatı ilə mübarizədə yardım edəcək.

“İŞİD regionun təhlükəsizliyi üçün təhlükə yaradır. Türkiyə İraqı və İraqın kürd muxtariyyətini onunla mübarizədə dəstəkləyəcək. Bu, bütün terror təşkilatları tamamən məhv edilənə qədər davam edəcək”, - türkiyəli nazir vurğulayıb.

Xatırladaq ki, oktyabrın 10-da Ankarada Türkiyə tarixində ən iri terror aktı törədilib. İki kamekadze-terrorçu tərəfindən törədilən partlayış zamanı 102 nəfər aksiya iştirakçısı həlak olub, 500-dən çox adam isə tibbi yardım üçün müraciət edib. İstintaqın əsas versiyası kimi terror aktının Rusiya Federasiyasında qadağan edilmiş İŞİD qruplaşması tərəfindən törədildiyi ehtimal edilir.

Ölkə.Az