Qərb Zelenskini kiminlə əvəzləyə bilər? (ŞƏRH)
"Avakovu Zelenskiyə qarşı qaldırmaq Rusiyanın maraqlarına xidmət edən oyundur".
Bunu Qaynarinfo-ya açıqlamasında Azərbaycan Yəhudi Media Mərkəzinin üzvü, politoloq Rüstəm Tağızadə Urkrayna prezidenti Volodimir Zelenskini Arsen Avakovla əvəzləmək istəyi barədə fikirləri şərh edərkən deyib.
"Rusiya-Ukrayna müharibəsində hazırda gedişat tamamilə fərqli məcrada davam edir. Kursk istiqamətində Ukrayna ordusu uğurlu əməliyyatlar həyata keçirir. Belə bir vəziyyətdə Volodimir Zelenskinin Arsen Avakovla əvəzlənməsi inandırıcı görünmür. Çünki Avakovun keçmişi müəyyən qədər Rusiya ilə əlaqəli olub", deyə ekspert bildirib.
Bu baxımdan da həmsöhbətimizə görə, Zelenskinin Avakovla əvəzlənməsi versiyası əslində Rusiyanın maraqlarına xidmət edən dezinformasiyadır:
"Rusiya sadəcə təbliğat-təşviqat, informasiya müharibəsindən istifadə edərək, Avakov məsələsini ortaya atıb. Bu kimi iddianın hər hansı bir əsası yoxdur. ABŞ və Böyük Britaniya Ukraynada yeni bir şəxsin prezident olmasını istəyirsə, bu onlara daha yaxın olan bir şəxs olacaq, nəinki Arsen Avakov. O isə 2014-cü ilə qədər Rusiyaya meylli bir şəxs olduğu məlumdur. Onun hətta Rusiya maraqlarına xidmət etdiyinə dair bəzi sübutlar da ortaya qoyulub. Mixael Saakaşvili Ukraynada işləyəndə Avakov ən çox ona qarşı çıxış edən şəxslərdən biri idi".
Ekspert qeyd edir ki, Qərb indilikdə Zelenskinin əvəzlənməsi barədə düşünmür:
"Bu barədə hər hansı bir məlumat yoxdur. Onun dəyişdirilməsi ortaya çıxacağı təqdirdə isə bu Avakov deyil, ABŞ-ın maraqlarına xidmət edəcək başqa birisi olacaq".
Qeyd edək ki, rusiyalı politoloq Əhməd Həsənovun iddiasına görə, ABŞ-ın siyasi elitası arasında Ukraynanın hazırkı lideri Volodimir Zelenskidən narazılıq səviyyəsi sürətlə artır. Ona görə də Vaşinqtonun Kiyevdə daha yaxşı idarə olunan və populyar fiqura ehtiyacı var.
Xatırladaq ki, Əhməd Həsənov bu fikirləri Rusiya Xarici Kəşfiyyat Xidmətinin ABŞ-nin Zelenskini Ukrayna Daxili İşlər Nazirliyinin keçmiş rəhbəri Arsen Avakovla əvəz edə biləcəyi ilə bağlı bəyanatını şərh edərkən deyib.
